Nursulton Ro‘ziboyev UFC bilan shartnoma imzoladi

O‘zbekistonlik MMA jangchisi Nursulton Ro‘ziboyev (35-8-2) UFC promousheni bilan shartnoma imzoladi.

Ro‘ziboyev UFC bilan shartnoma imzolagani haqidagi ma’lumot promoushen jangchilari haqida yangilik taqdim etadigan Twitter sahifasida paydo bo‘ldi.

Xabarlarga ko‘ra, o‘zbekistonlik yakkakurashchi eng nufuzli MMA promousheni bilan 4 ta jangga bitim imzolagan.

Ro‘ziboyev UFC promoushenida jang qiladigan beshinchi o‘zbekistonlik bo‘ladi. Bungacha ligada O‘zbekiston nomidan Mahmud Murodov, Zarrux Adashev, Liliya Shokirova va Saidyoqub Qahramonov jang qilishga ulgurgandi. Hozirda faqat Murodov ushbu ligadagi yurishini davom ettirmoqda.

Ro‘ziboyev MMA’dagi faoliyati davomida 45 ta jang o‘tkazgan. Ularning 35 tasida g‘alaba qozongan. G‘alabalarining 33 tasi muddatidan avval qo‘lga kiritilgan: 21 sabmishen, 12 nokaut. Yana uning hisobida 8 mag‘lubiyat va 2 durang ham bor.