Surxondaryo viloyatining qator hududlarida 9-iyun kuni chang bo‘ronlari kuzatildi. Holat aks etgan videolar ijtimoiy tarmoqlarda tarqaldi.

“Daryo”ning Afg‘onistondagi muxbiri xabar qilishicha, chang bo‘roni Mozori Sharif shahridan Afg‘onistonning shimoliy viloyatlariga, undan keyin O‘zbekistonning Surxondaryo viloyatiga ko‘chgan.

Viloyat FVB matbuot xizmati bergan ma’lumotga ko‘ra, viloyatning Termiz shahri, Denov, Sariosiyo, Angor, Sherobod, Muzrabot, Qiziriq va Bandixon tumanlarida 4-12 metr/sekund tezlikda shamol esishi sababli chang-to‘zon kuzatildi. Hodisa bo‘yicha fuqarolardan FVBga murojaatlar kelib tushmadi. Hozirda vaziyat barqaror.

“O‘zgidromet” 9-iyun kuni ayrim hududlarda, shu jumladan, Surxondaryo viloyatida chang-to‘zonlar kuzatilishi mumkinligi haqida avvaldan xabar bergan edi. Prognozlarga ko‘ra, bunday ob-havo 10-iyunda ham kuzatilishi mumkin.