“Daryo” tashkil qilgan debatda Ekologiya davlat qo‘mitasi vakili ishtirok etishdan bosh tortdi

“Daryo”ning “Shaxsiy fikr” rukni ostidagi debatda Ekologiya davlat qo‘mitasi va shahar boshqarmasi vakillari ishtirok etishdan bosh tortdi.

7-iyun kuni yangi debat bo‘lib o‘tishi kerak edi, unda opponentlar sifatida “Ecolog.uz” asoschisi va bosh muharriri Nargis Qosimova hamda Toshkent shahar ekologiya va atrof-muhitni muhofaza qilish boshqarmasining tashkilot rahbariyati tomonidan tanlangan vakili ishtirok etishi kerak edi. 

“Shaxsiy fikr” dasturini tashkil qilishda “Daryo” muxbiri uzoq vaqt davomida Ekologiya qo‘mitasining matbuot xizmati yoki boshqa vakili bilan bog‘lanishga urindi, ammo hech qanday natija bo‘lmadi – faqat “Ishonch telefoni” operatorlari javob berdi, ular ham “hech qanday yordam bera olmasliklarini” ma’lum qilishdi.

“Daryo” tahririyati rasmiy so‘rov yuborishi xabar qilinganida operatorlar Toshkent shahar Ekologiya boshqarmasining telefon raqamini berishdi. Boshqarmada bizga ijobiy javob berishdi va hatto dastur uchun potensial ishtirokchini ham ajratishdi, ammo tasvirga olish boshlanishidan 15 daqiqa oldin u shoshilinch yig‘ilish bahonasida dasturda ishtirok etishdan bosh tortdi va shu bilan butun tahririyatning rejalarini puchga chiqardi. Belgilangan xodim qo‘ng‘iroqlarga umuman javob bermadi.

“Daryo” Toshkent shahar va O‘zbekiston Respublikasi hukumatining barcha vakolatli organlaridan yuqorida tilga olingan boshqarmalar va ularning ommaviy axborot vositalariga munosabatiga e’tibor qaratishlarini so‘raydi, chunki ular jurnalistlarning kasbiy faoliyatiga nisbatan hurmatsizlikni yaqqol ko‘rsatib, mamlakatimizdagi davlat organlarining ochiqlik siyosatini shubha ostiga qo‘ymoqda.