Telegram’dagi “G‘azna” kanalida UMS aloqa operatori o‘tkazgan tender g‘olibi raqiblaridan bor-yo‘g‘i 1 tiyin kamroq narx taklif qilib lotni yutib ketgani haqida post e’lon qilindi. “Daryo” muxbiri holat yuzasidan izoh olish maqsadida tashkilot mas’ullari bilan bog‘landi.
3—11-may kunlari o‘tkazilgan tenderning boshlang‘ich narxi 7 milliard 470 million so‘m bo‘lgan. Lot yakunlari bo‘yicha g‘olib korxona Namangan shahri uchun UMS MChJning MRTT obyektlarida namunaviy loyihalar bo‘yicha metall konstruktorlar tayyorlash, qurilish-montaj ishlari va nofaol infratuzilma obyektlarini demontaj qilish ishlarini bajarib berishi kerak.
Telegram kanalda yozilishicha, tenderda 3 ta korxona qatnashgan va Energycon MChJ raqiblaridan 1 tiyin kamroq narx taklif qilib yutib ketgan.
Haqiqatdan ham, etender.uzex.uz portalining umumiy amalga oshgan tenderlar ro‘yxatidagi qisqacha qaydda ushbu tenderning boshlang‘ich va shartnomaviy narxlarida bir tiyinlik farq bor.
Ammo xarid protokolida vaziyat boshqacha: uchta korxona turlicha narxlar taklif etgan va ko‘rsatkichlar portaldagi ma’lumotga to‘g‘ri kelmaydi. Xususan, g‘olib Energycon MChJ 7 milliard 469 million 999 ming 999 so‘m 99 tiyin emas, 6 milliard 669 million 642 ming 857 so‘m 14 tiyin taklif etgan.
Holat yuzasidan munosabat olish maqsadida UMS’ning ushbu tender bo‘yicha mas’ul eksperti Sardor Muratov bilan bog‘landik.
“Protokolda hech qanday muammo yo‘q. Hamma turlicha narxlar taklif etgan, boshlang‘ich summadan bir tiyinga tushirib yutib ketish holati bo‘lmagan, g‘olib deb topilgan korxona ham 6,6 milliard so‘m atrofida narx taklif qilgan. Va hali hech qanday kelishuv imzolangani yo‘q, jarayon yakunlansa, albatta, fayllarni portalga joylaymiz”, — deya tushuntirdi u.
Izoh (0)