Prezident Shavkat Mirziyoyevning Toshkent shahri Uchtepa tumaniga qilgan tashrifidan keyin maktabda supuruvchi bo‘lib ishlovchi Aleksandr Sokolovning uyi taʼmirlab berildi. Bu haqda Uy-joy kommunal xizmat ko‘rsatish vazirligi axborot xizmati “Daryo”ga maʼlum qildi.
Kutilmagan tashrif
Prezident Shavkat Mirziyoyev 2022-yilning 13-dekabr kuni Uchtepa tumaniga qilgan tashrifi chog‘ida ko‘p qavatli uylar va ularning atrofi qay darajada obodonlashtirilganini ko‘zdan kechirgan edi. O‘shanda davlat rahbari avvaldan rejalashtirilmagan holda xonadonlardan birining sohibi bilan ko‘rsatilayotgan kommunal xizmatlar sifati haqida suhbatlashgandi.
Prezident bilan uchrashgan xonadon egasi Aleksandr Sokolovning aytishicha, prezidentning tashrifi oldindan rejalashtirilmagan va u buni kutmagan.
“Shavkat Mirziyoyev istalgan xonadonga kirishi mumkin edi. Mendan issiqlik tizimi haqida so‘radi. Prezident menga hammasi yaxshi bo‘ladi, deb aytdi. Shokka tushib qolgan edik. Hamma uchun kutilmagan holat bo‘ldi. Prezidentni yaqindan ko‘rdim, qo‘l berib ko‘rishdim”, — dedi xonadon egasi.
U uyi yaqinidagi maktablarning birida hovli supuruvchi bo‘lib ishlaydi.
“Uchrashuvdan keyin atrofdagilarning menga munosabati o‘zgardi. Uchta farzandim bor. Bolalarim katta: o‘qiydi, ishlaydi”, — dedi Aleksandr Sokolov.
Uy taʼmirlab berildi
Aleksandr Sokolov ko‘p qavatli uyda 3 xonali xonadonda uch farzandi bilan yashab kelgan. Uning xonadoni taʼmirtalab bo‘lgani bois tashrifdan so‘ng 2022-yilning dekabri oxirida hokimlik tomonidan taʼmirlash ishlari boshlangan. Oila bir muddatga boshqa joyga vaqtincha ko‘chirib turilgan.
Uy-joy kommunal xizmat ko‘rsatish vazirligi axborot xizmatining “Daryo”ga maʼlum qilishicha, taʼmirlash ishlari fevral oyi oxirida o‘z nihoyasiga yetgan. Ayni vaqtda oila o‘z xonadonida yashamoqda.
Izoh (0)