Madaniyat va turizm vaziri Ozodbek Nazarbekov 25-may — So‘nggi qo‘ngiroq bayrami munosabati bilan Toshkent shahri Yashnobod tumanidagi 255-maktabga bordi. Vazir u yerda bitiruvchi o‘quvchilarni bayram bilan tabriklab, ular bilan suhbatlashdi, deb xabar bermoqda “Daryo” muxbiri.
Ozodbek Nazarbekovning aytishicha, vazirlar va hokimlarning hududlardagi maktabga borib, o‘quvchilar bilan uchrashish tashabbusi prezident ko‘rsatmasiga asosan amalga oshirilgan.
“Prezident topshirig‘i bilan turli vazirlar, viloyat, shahar va tuman rahbarlari hududlardagi maktablarga tashrif buyurishni boshlagandi. Shu sabab oxirgi ikki yilda O‘zbekistondagi ko‘plab hududlarga borib, o‘quvchilar bilan uchrashuvlar tashkil etdik. Bu loyiha maktab o‘quvchilari bilan suhbatlashib, muammolarini o‘rganib, ilm-fanga bo‘lgan qiziqishlarini oshirish, motivatsiya berish, keyingi hayotga bo‘lgan ishonchlarini kuchaytirish maqsadida joriy etilgan. Bu yaxshi natija beryapti. Biz ham san’atga aloqador ayrim maktablarga biriktirilganmiz, biz ular bilan, ota-onasi bilan doimiy muloqotdamiz, soha bo‘yicha eng shijoatli yoshlar bilan ishlayapmiz.”, — dedi vazir.
Uning ta’kidlashicha, vazirlar va o‘quvchilar uchrashuvlari ortidan maktablardagi ko‘plab muammolar hal bo‘lishiga erishilmoqda.
“Ko‘ryapmizki, maktablarning sifat darajasi oshib boryapti. Vazirlarning tashrif buyurishi ortidan esa o‘sha maktablarning ko‘plab muammolari hal bo‘lyapti. Yuqori tashkilotlarga murojaat qilish maktabning o‘zida qolib ketmayapti-da, o‘sha vazir orqali masalalar yechilib ketyapti”, — deb aytib o‘tdi Ozodbek Nazarbekov.
Vazir, shuningdek, odamlar taraqqiyotga faqat ilm orqali yetishish mumkin ekanini tushunib yetganini bildirdi.
“Ta’limga bo‘lgan e’tibor xalq harakatiga aylandi. Najot ilmda ekanini tushunib yetdik. Hozir o‘qituvchilar, ota-onalar ham talabchan. Xalqimiz yoshlarga bilim berish orqaligina taraqqiyotga erishishimiz mumkinligini tushunib yetdi”, — deya so‘zlarini izohladi u.
Izoh (0)