Ukraina prezidenti Vladimir Zelenskiy mamlakat g‘alabasini yaqinlashtiradigan faol harakatlarga tayyorlanayotganini aytdi. U urushning 400 kunligi bilan xalqqa qilgan murojaatida bu haqda gapirdi.
“To‘liq miqyosdagi tajovuzdan himoya qilishimizning to‘rt yuz kunligi. Bu biz bosib o‘tgan ulkan yo‘l. Ukraina uchun kurashgan va kurashayotgan, ukrain xalqi uchun qayg‘urgan va qayg‘urayotgan, logistikamizga yordam bergan va yordam berayotgan, Ukraina barqarorligini mustahkamlagan va mustahkamlayotganlar — hammamiz birgamiz”, — dedi Zelenskiy.
Siyosatchi Ukraina 2022-yil fevral oyining eng og‘ir kunlarini o‘tkazganini, bu qishdan omon qolganini ta’kidladi. U shimoliy hududlarning bahorgi ozod etilishi tasodif emasligini aytdi.
“Kiyev, Chernigov, Sumi viloyati uchun jang... Xarkov tumanlarining qaytishi, Xersonning qaytishi, Baxmut va Donbassning mudofaasi — bu ukrainaliklarning qahramonligi, uni dunyo unutmaydi. Biz keyingi qadamlarni, faol harakatlarimizni tayyorlayapmiz. G‘alabamiz yaqinlashishiga tayyorlanayapmiz”, — dedi u.
Shuningdek, Zelenskiy Ukraina urushda g‘alaba qozonishi, chunki erkinlik va adolat, insoniylik va hurmat, xalqqa munosib bo‘lgan tinchlik g‘alaba qozonishi kerakligini aytdi.
Izoh (0)