Hamza Yusuf Shotlandiya hukumatining ilk musulmon rahbari bo‘ldi
Shotlandiya sog‘liqni saqlash vaziri Hamza Yusuf hukmron Shotlandiya natsional partiyasining (SHNP) yangi rahbari etib saylandi. Shu asosda u hukumatning ilk musulmon rahbariga aylanadi. Bu haqda SHNP milliy kotibi Lorna Finn 27-mart kuni partiya a’zolari o‘rtasida ovoz berish natijalari yakunlanganidan keyin e’lon qildi.
Saylovning ikkinchi bosqichida Yusuf 52,1 foiz ovoz bilan g‘alaba qozondi. Uni 26 mingdan sal ko‘proq partiya aʼzosi qo‘llab-quvvatladi. Ikkinchi o‘rinni Shotlandiya moliya vaziri Keyt Forbs (23,9 ming ovoz yoki 47,9 foiz), uchinchi o‘rinni jamiyat xavfsizligi bo‘yicha sobiq vazir Ash Rigan (5,6 ming ovoz) egalladi.
Yusuf fevral oyi o‘rtalarida isteʼfoga chiqishini eʼlon qilgan Shotlandiya bosh vaziri Nikola Sterjenning o‘rnini egallaydi. Sterjen 2014-yildan beri Shotlandiya hukumatini boshqarib kelardi.
SHNP o‘z oldiga qo‘ygan maqsad — Britaniyadan mustaqillikka erishish. Saylovda g‘alaba qozonganidan so‘ng, Yusuf Shotlandiyaning ajralib chiqishi “hozirgi avlod davrida” sodir bo‘lishi kerakligini aytdi. Biroq so‘nggi so‘rovnomalar ko‘pchilik Shotlandiya mustaqilligiga qarshi ekanini ko‘rsatmoqda.
Hamza Yusuf 1985-yilda Glazgoda tug‘ilgan. Uning otasi Buyuk Britaniyaga Pokistondan, onasi Keniyadan ko‘chib kelgan.
Angliya, Shotlandiya, Uels va Shimoliy Irlandiyani o‘z ichiga olgan Birlashgan Qirollikning 68 millionlik umumiy aholisidan taxminan 5,5 millionini shotlandlar tashkil qiladi. Mamlakat 1999-yildan boshlab o‘z parlamenti va hukumatiga ega.
Shotlandiya mustaqilligi bo‘yicha birinchi referendum 2014-yilda o‘tkazilgan. Unda mintaqada yashovchi fuqarolardan “Mamlakat mustaqil bo‘lishi kerakmi?” degan savolga javob berish so‘ralgan edi. Yakuniy natijalarga ko‘ra, ovoz berganlarning 55,3 foizi ajralib chiqishga qarshi bo‘lgan, 44,7 foizi esa mustaqillikni yoqlagan.
2022-yil noyabr oyida Buyuk Britaniya Oliy sudi Britaniya parlamentining roziligisiz Shotlandiya ikkinchi marta mustaqillik referendumini o‘tkaza olmasligi haqida qaror chiqardi.
