Davlat xavfsizlik xizmatining Navoiy viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar vakillari bilan hamkorlikda o‘tkazilgan tezkor tadbirda favqulodda vaziyatlar bo‘limi xodimi qo‘lga olindi, deb xabar beradi O‘zA.
Qayd etilishicha, Nurota tuman favqulodda vaziyatlar bo‘limi xodimi dehqonchilikka ixtisoslashgan fermer xo‘jalik rahbari bilan o‘zaro til biriktirib, ushbu xo‘jalikning 80 gektar yer maydonini xaridorga 1 milliard so‘mga sotishga kelishib, oldindan 700 million so‘m olgan vaqtlarida ushlandi.
Shuningdek, Andijon shahridagi qurilish firmasi rahbari shahar hokimligi zaxirasida bo‘lgan 14 sotix yer maydonini go‘yoki o‘ziga tegishli ekanini aytib, rasmiylashtirib berish evaziga 40 ming dollar olgan vaqtida ushlangan.
Samarqand tumanida esa ushbu tumanda yashovchi fuqaro tuman hokimining tegishli qarori bilan unga dehqon xo‘jaligi tashkil etishi uchun berilgan 35 sotix yer maydonini xaridor nomiga rasmiylashtirib berish evaziga 45 ming dollar talab qilib, oldindan 25 ming dollar olgan vaqtida qo‘lga olingan.
Avvalroq Toshkent viloyatida 420 gektar yerni 700 ming dollarga noqonuniy sotmoqchi bo‘lganlar ushlangani to‘g‘risida xabar berilgandi.
Izoh (0)