Koreyada o‘qiyotgan xorijlik talabalar ichida o‘zbekistonliklar soni uchinchi o‘rinda ekani maʼlum qilindi

Koreyada o‘qiyotgan xorijlik talabalar ichida o‘zbekistonliklar soni uchinchi o‘rinda turadi. Bu haqda Toshkent shahrida bo‘lib o‘tayotgan O‘zbekiston-Koreya oliy taʼlim muassasalari rektorlari forumida maʼlum qilindi, deya xabar bermoqda “Daryo” muxbiri.

Forumning kirish qismida Koreya bosh vaziri o‘rinbosari, taʼlim vaziri Li Ju Xoning ishtirokchilarga yo‘llagan videomurojaati namoyish qilindi. Vazirning aytishicha, hozirda Koreyada o‘qiyotgan xorijlik talabalar ichida o‘zbekistonliklar soni uchinchi o‘rinda turadi.

“Hozirda Koreya respublikasining uchta universiteti filiaallari O‘zbekistonda faoliyat olib bormoqda. Koreya oliy taʼlim muassasalarida tahsil olayotgan xorijlik talabalar o‘rtasida o‘zbekistonlik talabalar son jihatidan uchinchi o‘rinda turadi. O‘zbekistonda taʼlim olayotgan koreyalik talabalar soni ham yil sayin o‘sib bormoqda. Bu taʼlim sohasida hamkorligimizni yanada kengaytirishda muhim jihatdir”, – degan u.

Tadbirda Universitet taʼlimi bo‘yicha Koreya kengashi raisi Xong Von Xvaning qo‘shimcha qilishicha, 2020-yil holatiga ko‘ra Koreyada tahsil olayotgan o‘zbekistonlik talabalar soni 8 ming 860 nafarni tashkil etgan.