O‘zbekistonda aholi punktidan tashqaridagi yo‘llarda qoidabuzarlikni aniqlashda dronlardan foydalanilishi mumkin
O‘zbekistonda aholi punktidan tashqaridagi yo‘llarda qoidabuzarlikni aniqlashda dronlardan foydalanish yo‘lga qo‘yiladi. Bu haqda Vazirlar Mahkamasining “Davlat yo‘l harakati xavfsizligi xizmatida yagona avtomatlashtirilgan axborot tizimini yaratish chora-tadbirlari to‘g‘risida”gi qarori loyihasida qayd etilgan.
Jamoatchilik muhokamasi uchun e’lon qilingan hujjat loyihasiga ko‘ra, IIV, Raqamli texnologiyalar vazirligi, Mudofaa vazirligi huzuridagi Mudofaa sanoati agentligi hamda boshqa manfaatdor tashkilotlar bilan birgalikda 2023-yil 1-oktabrgacha aholi yashash punktlaridan tashqaridagi yo‘llarda qoidabuzarlik yoki hodisalarni, qidiruvdagi transport vositasini aniqlash, zarur choralarni ko‘rish hamda yordam ko‘rsatishda tezkorlikka erishish maqsadida uchuvchisiz uchadigan apparatlardan foydalanish hamda ularni saqlash bo‘yicha ilg‘or xorij tajribasini o‘rganib chiqib, belgilangan tartibda Vazirlar Mahkamasiga taklif kiritadi.
Zamonaviy raqamli texnologiyalar hisobiga tarqoq tizimlarni birlashtirish orqali yo‘l harakati xavfsizligini boshqarishning samaradorligini oshirish, aholiga munosib xizmat ko‘rsatish maqsadida, IIV Jamoat xavfsizligi departamenti Yo‘l harakati xavfsizligi xizmatida yagona avtomatlashtirilgan axborot-tahlil tizimi yaratiladi.
Yagona axborot tizim YHXXning barcha amaldagi axborot tizimlarini yagona platformaga o‘zaro integratsiya qiladigan platforma hisoblanadi va respublika ijro etuvchi hokimiyat hamda prokuratura va sud organlarining faoliyatiga joriy etilgan axborot tizimlariga integratsiya qilinadi.
Ma’lumotlarni maqsadli almashish uchun ushbu tizim xo‘jalik yurituvchi subyektlarning faoliyatiga joriy etilgan axborot tizimlariga amaldagi qonunchilikka muvofiq shartnoma asosida integratsiya qilinadi.
Yo‘l harakati qoidalarining buzilishiga doir ma’muriy ishlar Yagona axborot tizimining “Ma’muriy amaliyot” moduli orqali o‘zaro integratsiya qilingan Ma’muriy huquqbuzarliklar to‘g‘risida yagona elektron ish yurituv tizimi (“E-ma’muriy ish” axborot tizimi) tartib-taomiliga muvofiq yuritiladi.
Yagona axborot tizimidagi huquqbuzarlik to‘g‘risidagi bayonnoma hamda ma’muriy jazo qo‘llash to‘g‘risidagi qarorlar “E-ma’muriy ish” axborot tizimi orqali shakllantiriluvchi yagona xos (unikal) raqam orqali ro‘yxatga olinadi.
Yo‘l harakati qoidalarining buzilishiga doir ma’muriy ishlarni ko‘rib chiqishni shu jumladan foto-video fiksatsiya qilishning avtomatlashtirilgan tizimi doirasida shakllantirilayotgan ma’lumotlarni o‘zida markazlashgan holda jamlovchi Yagona axborot tizimining “Ma’muriy amaliyot” moduli ishlab chiqiladi.
Yagona axborot tizimining “Ma’muriy amaliyot” moduli Oliy sud hamda Bosh prokuratura huzuridagi MIBning tegishli axborot tizimlariga integratsiya qilingan holda faoliyat yuritadi.
Ushbu hujjat loyihasi muhokamasi 8-aprelga qadar davom etadi
