Braziliyaning Embraer konglomerati ishtirokida “Aviatsiya kelajagi: O‘zbekiston. Embraer kuni” mavzusida davra suhbati bo‘lib o‘tdi, deb xabar beradi O‘zA.
Ma’lum qilinishicha, davra suhbati chog‘ida Embraer havo kemalari taqdimoti o‘tkazilib, o‘zaro hamkorlik istiqboli muhokama qilingan. Embraer konglomerati vitse-prezidenti Joao Pedro Taborda Markaziy Osiyo mintaqasida aviatsiya va turizm sohasi shiddat bilan rivojlanayotgani, aviatsiya bozorida yangi xususiy aviakompaniyalar paydo bo‘layotganini qayd etgan. Qisqa va o‘rta masofaga mo‘ljallangan havo kemalarini mamlakatda faoliyat olib borayotgan aviakompaniyalarga qulay shart asosida yetkazib berishga tayyor ekanligini bildirgan.
“Shu bilan birga tadbir davomida mamlakatimizga tashrif buyurayotgan sayyohlar sonini oshirish va turistlarga qulaylik yaratish maqsadida xalqaro aviaqatnov yo‘nalishlarini diversifikatsiya qilish, o‘rta masofaga xalqaro va ichki qatnovni joriy etishda Embraer tomonidan ishlab chiqarilayotgan havo kemalari afzalligi yuzasidan fikr almashildi”, — deyiladi xabarda.
Tadbir yakunida Embraer dunyo bo‘ylab amalga oshirayotgan maxsus targ‘ibot dasturi doirasida “E195-E2” havo kemasini 2023-yil iyun oyida O‘zbekistonga olib kelish hamda aviakompaniya va turizm sohasi vakillari uchun Asia connect anjumanini tashkil etishga kelishib olingan.
Kompaniya haqida
Embraer konserni Braziliya hukumati tomonidan 1969-yilda tashkil etilgan va asosan ichki bozor uchun ishlagan. 1994-yilda kompaniya xususiylashtirilgan, 2000-yilda esa IPO o‘tkazilgan.
U tijorat, xususiy, harbiy va qishloq xo‘jaligi ehtiyojlari uchun samolyotlar ishlab chiqaradi va bu sohada Airbus va Boeingdan keyin dunyoda 3-o‘rinni egallaydi.
2022-yilda Embraer mijozlarga 57 ta tijorat layneri va 102 ta biznes-jet yetkazib berdi. Konglomerat tomonidan ishlab chiqarilgan, 70 dan ziyod mamlakatga eksport qilingan 2 000 dan ortiq havo kemasidan ayni payt 130 dan ortiq aviakompaniya foydalanmoqda.
Ma’lumotlarga ko‘ra, mintaqaviy o‘rta sig‘imli (150 o‘ringacha) yo‘lovchi tashuvchi havo kemasi ishlab chiqarish bo‘yicha yetakchi sanalgan ushbu korxona jahon bozorida ayni turdagi uchoq savdosining 29 foizini qoplaydi.
Izoh (0)