“Manchester Siti”ning moliyaviy qoidabuzarliklari isbotlansa, uni qanday jazolar kutib turgani ma’lum.
Avvalroq, Manchester klubidan ochkolar tortib olinishi va APLdan chetlatilishi mumkinligi xabar qilingandi. Biroq jazo faqatgina bundan iborat emas.
Sky Sports nashrining xabar berishicha, “Manchester Siti” ishini ko‘rib chiqayotgan mustaqil komissiya klubni chempionat o‘yinlaridan chetlatishi, liga rahbarlariga ba’zi o‘yinlarni qayta o‘tkazishni tavsiya qilishi va tovon puli to‘lashni joriy qilishi mumkin. Shuningdek, komissiya ba’zi futbolchilarning ro‘yxatdan o‘tkazilishini bekor qilishi mumkin. Undan tashqari yetkazilgan zararning o‘rnini qoplash uchun yo‘naltirilgan shartli hukm yoki jarima ham joriy qilinadi.
Qayd etilishicha, “shaharliklar”ning aybi isbotlangan taqdirda kelasi mavsumda klubdan ochkolar olib tashlanadi. Jarayon joriy mavsum oxirigacha yakunlanmasa, bu sodir bo‘ladi.
The Athletic’ning qo‘shimcha qilishicha, “Manchester Siti”dan ochkolar olib tashlansa, sovrinlardan ham mahrum bo‘ladi.
Eslatib o‘tamiz, Angliya Premyer Ligasi “Manchester Siti” klubini 100 dan ortiq moliyaviy qoidalarni buzganlikda ayblamoqda. Klub esa bu ishda hech qanday aybi yo‘qligi borasida bayonot berdi.
Izoh (0)