Shavkat Mirziyoyev mahalliy mahsulotlar tannarxini tushirish bo‘yicha yordam berish kerakligini aytdi
3-fevral kuni Shavkat Mirziyoyev Namangan shahridagi “Barkamol avlod” kichik sanoat va tadbirkorlik zonasida bo‘ldi. Bu haqda Prezident matbuot xizmati xabar qildi.
Qayd etilishicha, mamlakatda tadbirkorlarga munosib sharoit yaratish uchun joylarda texnopark va kichik sanoat zonalari tashkil etilmoqda. Namangan viloyatida bunday majmualar soni 73 taga yetgan.
“Barkamol avlod“ mahallasi yonidagi 10 gektarda zarur infratuzilmaga ega yaxlit majmua qurilgan. Bu yerga 46 ta loyiha joylashtirilgan. Ularning 18 tasida ishlar yakunlanib, korxonalar faoliyatini boshlangan, 2 mingdan ortiq ish o‘rni ochilgan.
Davlat rahbari shu yerdagi “Master klass dizayn”, “Sifat yog‘och sanoat”, “Balans teks” korxonalaridagi ish jarayonini ko‘zdan kechirgan.
Birinchi korxonada yiliga 150 ming dona charm-poyabzal mahsulotlari ishlab chiqarilmoqda. “Sifat yog‘och sanoat” yiliga 1 ming 200 to‘plam mebellar, “Balans teks” 400 ming dona to‘qimachilik tovarlari tayyorlash quvvatiga ega. Ularda qo‘shni mahallalardagi avval ishsiz bo‘lgan yoshlar, xotin-qizlar mehnat qilib, daromad topmoqda.
“O‘zi odamlarimiz ishbilarmon, shijoatli. Mana, zamin yaratuvdik, tadbirkorlik ‘yurib ketdi’. Endi ishlab chiqaruvchilarga tannarxni tushirish bo‘yicha yordam berish kerak. Tannarx - tadbirkorning ‘hayot-mamoti’. Tannarx pasaysa, eksportga chiqish yengillashadi, biznes kengayadi, yana ishchi oladi“, — degan Shavkat Mirziyoyev.
Sanoat zonasidagi boshqa loyihalarda uskunalar o‘rnatilmoqda. Bu yerda tayyor kiyim-kechak, charm-poyabzal, qurilish materiallari, mebel, qog‘oz, oziq-ovqat va kimyo mahsulotlari ishlab chiqariladi. Shu atrofdagi “Barkamol avlod”, “Yakkatut”, “Yangihayot”, “Objuvoz”, “Lola”, “Chaman” mahallalarida yashovchi 6 mingdan ziyod aholi ish bilan ta’minlanadi.
Prezident shu yerda Namanganda ishlab chiqarilayotgan sanoat mahsulotlari ko‘rgazmasi bilan ham tanishgan. Mavjud tarmoqlarga qo‘shimcha asalarichilik, zargarlik, meva-sabzavotchilikni rivojlantirish bo‘yicha ko‘rsatmalar berilgan.
