Ukraina Qurolli kuchlari Harbiy-havo kuchlari qo‘mondonligining ma’lum qilishicha, Rossiya qo‘shinlari 26-yanvarga o‘tar kechasi Ukrainaga 24 ta “Shahed-136/131” kamikadze-dronlari bilan hujum qildi. Dronlarning barchasi urib tushirildi.
“Dronlar zenit-raketa bo‘linmalari, qiruvchi aviatsiya, havo kuchlarining mobil o‘t ochish guruhlari tomonidan Ukraina mudofaa kuchlarining boshqa tarkibiy qismlari havo hujumidan mudofaa bo‘linmalari bilan hamkorlikda yo‘q qilindi”, — deyiladi xabarda.
Ukraina Qurolli kuchlari maʼlumotlariga koʻra, hujumchi dronlar Azov dengizining sharqiy qirgʻogʻidan uchib kelgan.
25-yanvar kuni kechqurun Ukrainaning ko‘plab hududlarida havo trevogasi yangradi. “UNIAN” maʼlumotlariga koʻra, uchuvchisiz uchoqlarning asosiy qismi Zaporojye va Dneprbo‘yi viloyatlari ustida urib tushirilgan. Keyinchalik Kiyev viloyatida havo hujumidan mudofaa tizimlari ishga tushgani haqida xabar berildi. 26-yanvarga o‘tar kechasi Dneprbo‘yi viloyat kengashi rahbari Nikolay Lukashuk mintaqadagi sanoat korxonasiga zarba berilganini ma’lum qildi. Uning so‘zlariga ko‘ra, zarbadan hech kim jabrlanmagan.
Oktabr oyi boshidan beri Rossiya Erondan sotib oladigan raketa va dronlar yordamida Ukraina hududiga muntazam ravishda ommaviy zarbalar bermoqda. Noyabr oyida Ukraina bosh vaziri Denis Shmigal Rossiyaning Ukraina energetika tizimiga zarbalari oqibatida yetkazilgan umumiy zarar 70 milliard grivnadan (taxminan 1,9 milliard dollar) oshganini aytgandi.
Izoh (0)