Rossiya Xavfsizlik kengashi raisi o‘rinbosari va prezidentning Harbiy-sanoat komissiyasidagi o‘rinbosari Dmitriy Medvedev kelasi yil nimalar sodir bo‘lishi yuzasidan o‘zining “futuristik farazlari” bilan bo‘lishdi. Xususan, u 2023-yilda Yevroittifoq parchalanib ketishini va AQSHda fuqarolar urushi boshlanishini istisno qilmayapti. Prognozni u o‘z Telegram-kanalida e’lon qildi.
“Ko‘pchilik futuristik farazlar bo‘yicha mashq qilib, eng kutilmagan va hatto mantiqsiz taxminlarni keltirmoqda. Biz ham qo‘ldan kelgancha o‘z hissamizni qo‘shamiz”, — deb yozdi Medvedev.
Siyosatchining 2023-yil bo‘yicha prognozlari orasida quyidagilar bor:
- neft narxi bir barrel uchun 150 dollargacha, gaz narxi esa 1 ming kubometr uchun 5000 dollargacha o‘sishi, asosiy fond maydonlarining AQSH va Yevropadan Osiyoga ko‘chishi;
- Buyuk Britaniya qaytganidan keyin, Yevropa ittifoqining parchalanishi va yevroning sobiq YeI valyutasi sifatida aylanishining bekor qilinishi;
- Germaniya va unga qo‘shilgan malaylar, shu jumladan, “Kiyev respublikasi”, Polsha va Boltiqbo‘yi mamlakatlari bazasida “To‘rtinchi reyx” tuzilishi;
- Fransiya va “To‘rtinchi reyx” o‘rtasidagi urush, Yevropaning bo‘linishi;
- AQSHda fuqarolar urushi, Kaliforniya va Texasning mustaqil davlatlarga ajralishi, AQSH prezidentligiga saylovlarda Ilon Maskning g‘alabasi.
Eslatib o‘tamiz, Medvedev “Rossiyskaya gazeta”da “Bizning xalqimiz, yerimiz, haqiqatimiz” nomli maqolasini chop ettirdi va unda 6 band bilan 2022-yil yakunlarini sarhisob qildi. U Ukrainaning amaldagi rasmiylari bilan tinchlik muzokaralarini rad etdi va davom etayotgan yadroviy tahdid haqida gapirdi. Ammo u “oxirzamon hali kelmaydi”, deb ishontirdi.
Izoh (0)