O‘zbekistonda hafta o‘rtalarida qor yog‘ishi kutilmoqda

Hafta o‘rtasida respublika bo‘yicha yomg‘ir ko‘rinishidagi yog‘ingarchilik bo‘ladi, yomg‘ir qorga aylanadi, deb xabar bermoqda “O‘zgidromet”.

Qayd etilishicha, 19-dekabr, dushanba kuni O‘zbekiston bo‘yicha yog‘ingarchilik kutilmaydi. Havo harorati 7-10 daraja iliq atrofida bo‘ladi.

20-dekabr, seshanba kuni respublikaning katta qismida 7-10 daraja iliq bo‘lgan harorat bilan quruq va nisbatan iliq ob-havo saqlanib turadi. Faqat shimoliy hududlarga Kavkaz hududlaridan sovuq antisiklon kirib kelishi boshlanadi. Front kirib kelishida Qoraqalpog‘iston bo‘yicha biroz qor yog‘ishi kutilmoqda. Ba’zi joylarda shamol 15-20 metr/sekundgacha kuchayadi. Havo harorati 0-3 daraja iliqqacha pasayadi.

21-dekabrda sovuq antisiklon kirib kelishi respublikaning barcha hududlariga tarqaladi. O‘zbekiston bo‘yicha ba’zi joylarda yomg‘ir va qor ko‘rinishida biroz yog‘ingarchilik bo‘ladi. Ba’zi joylarda shamol 15-20 metr/sekundgacha kuchayadi. Havo harorati kechasi 3 daraja sovuq — 2 daraja iliq, kunduzi 3-8 daraja iliq atrofida bo‘ladi. Respublika shimolida kechasi harorat 9-11 daraja sovuqqacha kuchayadi, kunduz kuni 0-3 daraja sovuqqacha pasayadi.

22—23-dekabr kunlari O‘zbekiston bo‘yicha yog‘ingarchilik kutilmaydi, faqat 22-dekabrda Farg‘ona vodiysi viloyatlarida ba’zi joylarda biroz qor yog‘adi. Harorat kechalari 2-5 daraja sovuqqacha, kunduz kunlari 2-5 daraja iliqqacha pasayadi.

Respublika bo‘yicha kechasi va ertalab tuman tushishi kutilmoqda.

21—22-dekabr kunlari yo‘llarda yaxmalak kuzatiladi.