Rossiya prezidenti Vladimir Putin Rossiya hukumati mamlakat harbiy doktrinasiga ogohlantiruvchi va qurolsizlantiruvchi yadroviy zarbani kiritish imkoniyatini ko‘rib chiqayotganini ma’lum qildi. Bu haqda u Bishkekka tashrif yakunlari bo‘yicha matbuot anjumanida aytib o‘tdi.
Putinning so‘zlariga ko‘ra, Rossiya AQSH bilan qiyoslaganda, “zamonaviyroq va samaraliroq” qanotli raketalarga hamda “hozircha AQSHda mavjud bo‘lmagan” gipertovushli majmualarga egadir.
“Shuning uchun, agar qurolsizlantiruvchi zarba haqida gapiradigan bo‘lsak, o‘z arsenalimizga amerikalik sheriklarimizning ishlanmalarini va ularning o‘z xavfsizligini ta’minlash bo‘yicha g‘oyalarini kiritish haqida ham o‘ylab ko‘rishimiz kerak bo‘lar. Biz bu haqda o‘ylayapmiz, xolos. O‘tgan vaqtlar davomida va o‘tgan yillarda bu haqda baralla gapirayotgan paytida hech kim uyalmagandi-ku”, — dedi Putin.
Uning ta’kidlashicha, AQSH strategiyasida preventiv zarba ko‘zda tutilgan, Rossiya doktrinasida esa “javob zarbasi” haqida qayd etilgan.
“Ammo agar potensial dushman preventiv zarba nazariyasidan foydalanish mumkin deb hisoblasa, biz esa unday fikrda bo‘lmasak, bu bizni boshqa mamlakatlar mudofaa sohasidagi shunday turdagi g‘oyalar tufayli, bizga nisbatan tug‘iladigan xavflar haqida o‘ylashga majbur qiladi”, — dedi Rossiya prezidenti.
Rossiya Ukrainaga bostirib kirganidan keyin Rossiya prezidenti Vladimir Putin yadro qurolini qo‘llash haqida muntazam tahdid qilib keladi. So‘nggi oylarda, The Wall Street Joyrnal ma’lumotlariga ko‘ra, AQSH prezidentining milliy xavfsizlik bo‘yicha maslahatchisi Jeyk Sallivan Moskvani yadro quroli yoki boshqa ommaviy qirg‘in qurolini qo‘llash fikridan qaytarish uchun Rossiya hukumati vakillari bilan bir necha marta maxfiy muzokaralar olib borgan.
Izoh (0)