“Daryo” internet nashrining YouTube’dagi kanali O‘zbekiston xalq artisti Bobomurod Hamdamov xonadonidan intervyu tayyorladi. Oilaning bir necha yildan buyon kelishmovchilikka borishining sababi nimada? Bu savolga ustoz san’atkorning kenja kelini Nargiza Abduqayumova quyidagicha javob berdi.

— Bobomurod Hamdamovning besh nafar farzandi bor. Oilaning boshqa a’zolari bugungi vaziyatga neytral, kuzatuvchi sifatida qarashadi. Uchinchi akamiz opamiz bilan birga uylarning xat-hujjatini to‘g‘irlab, sotishga ko‘maklashgan. Ular ommaga chiqib men haqimda juda yomon gaplarni gapirishdi. Ammo xursand bo‘lganim, yaqinda xonadonimga kelib, hech narsa bo‘lmagandek mehmon bo‘lishdi. Mol-dunyo va nafs yomon narsa ekan. Insonni bir zumda o‘zgartirib, jigarlarni ham bir-biriga qarshi qilib qo‘yarkan. Qaynotam uchun ularni kechirdim, turmush o‘rtog‘imdan ham o‘tgan voqealarni unutishlarini iltimos qildim. Ikki akamiz Turkmanistonda yashaydi, bu yerga kelishga har doim ham imkonlari bo‘lmaydi. Ikkinchi o‘g‘il qaynonam rahmatli bilan telefon orqali gaplashib turardi. Ammo birinchi akamizni shu kungacha biror marta ko‘rmaganman.Gapirgan odam hamisha haqdek tuyuladi. Ular ommaga chiqib, gapganda ko‘pchilik ularni haq deb bilgandi. Ammo o‘sha paytda “Yolg‘on gapirishayapti, aslida vaziyat bunday” deyolmadim. O‘sha video chiqishlar 30-40 ta ko‘payib ketganidan keyin ichki ishlar xodimlariga murojaat qilib, har bir gapni asoslab berishlarini so‘radim. Turgan gapki, ommaga chiqib aytilgan birorta gapga asos ko‘rsatisholmadi. Tuhmat uchun javobgarlikka tortilishdi va ma’naviy zarar ham to‘lashdi.

Ota-ona oyog‘ida yurib, katta daromad topganida hammaga kerak edi. Kenja ukasi va uning oilasini ota-onalarining ostonasiga ham yaqinlashtirishmagan. Hech kimga sir emas, ilgari dadamning xizmat haqlari nihoyatda katta bo‘lgan. Bir kunda kamida 1 000 AQSH dollari, yoki 2 000-3 000 AQSH dollarigacha mablag‘ topardi. U paytda hammaga kerak bo‘lgan ota, keksayib, kuchdan qolganda ularga kerak bo‘lmay qoldi.

Yashirmayman, Bobomurod Hamdamovning o‘g‘li Shamshiddin Hamdamov bilan tanishganimda, birinchi oilam bilan ajrashib, ikkita farzandim bilan yashardim. Shu boisdan qaynonam meni kelin qilishni istamagandi. 14 yilga qadar qaynonam bilan birga yashamaganmiz. Ammo qaynotam bilan munosabatlarimiz yaxshi edi. Hamisha gostrol safarlarida turmush o‘rtog‘im va qaynotamning yonida bo‘lardim. Keyinchalik qayonam bilan munosabtlarimiz yaxshilandi. Eng quvonganim, turmush o‘rtog‘imga “Sening farzanding emas”, deyishgan o‘g‘il-qizim bobosi va buvisining duosini oldi, oilamizning kuniga yarayapti,  — deydi Bobomurod Hamdamovning kelini Nargiza Abduqayumova.

Mavzuga doir:

• “Shogirdlar Bobomurod Hamdamovning haqqini berishmayapti” — Xalq artisti qo‘shig‘ini ruxsatsiz ijro etgan xonandalar bilan sudlashmoqda (video)
• “Xudodan qo‘rqmagan odamdan qo‘rqdim”. O‘zbekiston xalq artisti Bobomurod Hamdamov oilaviy nizolar tufayli ijara uyda yashamoqda (video)
• O‘zbekiston xalq artisti Bobomurod Hamdamovning qizi uning mol-mulkini o‘z nomiga o‘tkazib oldi: Xonanda 81 yoshida ko‘chada qolishi mumkin