“Twitter'dan foydalanuvchilar soni oyiga bir milliardga yetishi mumkin” — Ilon Mask
Twitter ijtimoiy tarmog‘i foydalanuvchilari soni bir yarim yil ichida oyiga bir milliard kishiga yetishi mumkin. Bu haqda Ilon Maskka tayanib “RBK” xabar bermoqda.
Mask xodimlar uchun o‘tkazilgan taqdimotdan slaydlarni namoyish etdi. Unda xavfsiz xabar almashish, uzun tvitlar yozish va boshqa funksiyalarga ega bo‘lgan ijtimoiy tarmoqning yangi versiyasi — Twitter 2.0 The Everything App ilovasi haqida gap boradi.
Taqdimotga ko‘ra, noyabr oyi o‘rtalarida kunlik ro‘yxatga olingan yangi foydalanuvchilar soni 2 millionga yetgan, bu o‘tgan yilning shu vaqtiga nisbatan 66 foizga ko‘pdir.
Bundan tashqari, Maskning so‘zlariga ko‘ra, foydalanuvchilar o‘rtasida ijtimoiy tarmoqda o‘tkazilgan vaqt o‘tgan haftada kuniga 8 milliard faol daqiqani tashkil etgan.
Men 12-18 oy ichida Twitter foydalanuvchilari soni oyiga bir milliardga yetishi istiqbolini ko‘rmoqdaman, — deb yozdi u.
Ilon Mask oktabr oxirida Twitter’ni 44 milliard dollarga sotib olish bo‘yicha bitimni yakuniga yetkazdi. Yozda u oldi-sotdi bitimidan bosh tortishga uringan edi, biroq sud uni ijtimoiy tarmoqni sotib olishga majbur qildi. Bu voqealar fonida Maskning boyligi apreldan buyon 70 milliard dollarga kamaydi.
Ijtimoiy tarmoqni sotib olganidan keyin Mask kompaniya xodimlarining yarmini, shu jumladan, bosh direktor Parag Agravalni, moliya direktori Ned Segalni, bosh huquqshunos Vijayu Gaddeni va boshqa bir qator top-menejerlarni ishdan bo‘shatdi.
Bloomberg ma’lumotlariga ko‘ra, Maskning yangi jamoasidagi ikki rahbar xodim — Yoel Rot va Robin Uiler iste’fo bergan. Avvalroq esa Twitter’ning axborot xavfsizligi bo‘limi boshlig‘i Lea Kissner ham ishdan bo‘shab ketgandi.
Ilon Maskning o‘zi esa xodimlariga yuborgan birinchi murojaatida kompaniya bankrot bo‘lishi mumkinligini bildirgan.
Mask verifikatsiya belgisi (ko‘k “galochka”) uchun to‘lov joriy etilishi haqida shu oy boshidayoq e’lon qilgandi. Bu avvalroq uni bepul qo‘lga kiritgan taniqli shaxslar va kompaniyalar profillariga ham tegishli bo‘ladi.
