Eron sanksiyalarga qaramasdan, dronlarni yasashda AQSHda chiqarilgan tarkibiy qismlardan foydalanmoqda — NYT
Eron zarbdor dronlarni ishlab chiqarishda AQSH va Yevropa mamlakatlaridan keltirilgan tarkibiy qismlardan foydalanmoqda, ularning importini taqiqlashi kerak bo‘lgan sanksiyalar bunga to‘sqinlik qilmayapti. Bu haqda New York Times gazetasi Conflict Armament Research tashkilotining tadqiqot ma’lumotlariga tayanib xabar bermoqda.
Tadqiqotchilar uchuvchisiz uchar qurilmalarning uchta modelini (Shahed-131, Shahed-136 va Mohajer-6) o‘rganib chiqib, ularda butun dunyo bo‘ylab 13 ta mamlakatning 70 ta ishlab chiqaruvchilariga tegishli 500 dan ortiq tarkibiy qismlarni aniqlagan. Shu bilan birga, ularning 82 foizi AQSHda ishlab chiqarilgan. Detallarning aksariyati 2020 va 2021-yillarda chiqarilgan.
Ukraina rasmiy shaxslari Eronni Rossiyaga Mohajer-6 va Shahed-136 dronlarini sotishda ayblamoqda. Rossiya prezidentining matbuot kotibi Dmitriy Peskov Kreml Ukrainada Eron dronlaridan foydalanilayotganidan bexabar ekanini aytgandi. 5-noyabr kuni Eron Rossiyaga uchar qurilmalar yetkazib berilganini tan olgan, biroq “kam miqdorda” va Ukrainada jangovar harakatlar boshlanishidan “bir necha oy avval” yuborilganini aytgandi.
Mavzuga doir:
