Green Card nima va uni qanday qo‘lga kiritish mumkin? Eng asosiy ma’lumotlar

Navbatdagi diversifikatsion lotereya boshlanishi arafasida “Daryo” grin-karta haqida, uning nima uchun kerakligi va qanday qilib uning sohibiga aylanish mumkinligi haqida ma’lumotlar to‘plab, havola etmoqda.

Green Card o‘zi nima va nega hamma uni qo‘lga kiritishni xohlaydi?

AQSH grin-kartasi — AQSH fuqarosi bo‘lmagan, ammo u yerda doimiy yashaydigan odamning istiqomat uchun guvohnomasi borligini tasdiqlaydigan va unga ishga joylashish huquqini beradigan identifikatsiya kartasi.

Grin-karta hech qanday to‘siqlarsiz mamlakatni tark etish va qaytib kelish, ishlash, ko‘chmas mulkka egalik qilish, mahalliy banklarda manfaatliroq kreditlarni olish, oliy ta’lim muassasalarida chegirmalar bilan o‘qish va AQSH fuqarolari uchun mo‘ljallangan stependiyalarga da’vogarlik qilish, ba’zi turdagi qurolli kuchlarda xizmat qilish hamda Amerika fuqarolari uchun boshqa imtiyoz va nafaqalardan foydalanish imkonini beradi.

Grin-karta odatda 10 yilga beriladi, unga ega bo‘lgandan so‘ng 5 yil o‘tgach, AQSH fuqaroligini olish uchun ariza berish mumkin.

U qanday majburiyatlarni yuklaydi?

Siz AQSH qonunlariga rioya qilishingiz, daromadlar haqida deklaratsiya e’lon qilishingiz va soliqlarni to‘lashingiz, yashash joyi o‘zgargani haqida migratsiya xizmatini xabardor qilishingiz kerak bo‘ladi. 18 yoshdan 25 yoshgacha bo‘lgan erkaklar esa zaruriyat yuzaga kelganda armiyada xizmat qilish ehtimoli uchun Selective Service’da ro‘yxatdan o‘tishi shart.

Mamlakatdan chiqish mumkinmi?

Grin-karta egasi taqvim yili mobaynida kamida 6 oy AQSHda bo‘lishi maqsadga muvofiq. Agar siz olti oydan ko‘proq, ammo bir yildan kamroq vaqt mamlakatdan tashqarida bo‘lgan bo‘lsangiz, kirishda uzoq vaqt AQSHda bo‘lmagani sababi haqida so‘rashadi. U holda bunday sabablarga dalillarni taqdim etish kerak bo‘ladi.

Agar AQSHdan bir yildan ko‘proq vaqtga ketish zarur bo‘lsa, shundan keyin mamlakatga kirish uchun ruxsatnoma olishga ariza beriladi (Reentry Permit).

Muhim narsa: mamlakatdan tashqarida bo‘lish muddatlari fuqarolik olish imkoniyatiga ta’sir o‘tkazadi. Grin-kartani qo‘lga kiritgandan keyin besh yil o‘tishi bilan Amerika fuqarosiga aylanish uchun AQSH hududida hammasi bo‘lib kamida 2,5 yil yashagan bo‘lish kerak.

Grin-kartani qanday qo‘lga kiritish mumkin?

AQSH grin-kartasini olishning bir nechta yo‘llari bor:

1. AQSH fuqarosi bilan turmush qurish

Ta’kidlash joiz, ushbu sxema nafaqat qizlar, erkaklar uchun ham ishlaydi. Bo‘lg‘usi er-xotinlar uchun talablarni mana bu yerda o‘qish mumkin.

2. Oila bilan qayta birlashish

Bu usuldan AQSH fuqarosining eng yaqin qarindoshlari — turmush o‘rtog‘i, 21 yoshgacha bo‘lgan, turmush qurmagan farzandlari, ota-onasi, 21 yoshdan oshgan aka-uka va opa-singillari foydalanishi mumkin.

3. Mehnat immigratsiyasi

Bu toifadagi vizani qo‘lga kiritish uchun bo‘lg‘usi ish beruvchi petitsiya berib, siz uchun bir necha dollar tikishi kerak. Bundan tashqari, yiliga beriladigan H-1B vizalari soni cheklangan: umumiy kvota 65 mingta bo‘lib, magistr va undan yuqori daraja egalari uchun qo‘shimcha 20 mingta viza ko‘zda tutilgan.

4. Siyosiy boshpana

Uni qo‘lga kiritish uchun o‘z mamlakatida irqiy, diniy, siyosiy yoki boshqa maqsadlarda ta’qib qilinayotganini isbotlovchi dalillarni taqdim etish zarur.

5. Investitsiyalar

Investitsiyalar evaziga ham grin-karta egasiga aylanish mumkin.

6. Diversifikatsion lotereya

Green Card lotereyasi nima va unda kimlar qatnashishi mumkin?

Diversifikatsion lotereya — AQSHda doimiy yashovchi maqomi (grin-karta)ni olish huquqini beruvchi vizalar o‘ynaladigan lotereya. U har yili o‘tkaziladi.

Unda AQSHga immigratsiya darajasi past bo‘lgan mamlakatlardan ziyolilar (tugallangan o‘rta ta’lim) yoki kasbiy tajribaga ega bo‘lganlar (kamida 2 yillik ish staji) qatnashishi mumkin.

Yutib olish ehtimoli qanaqa?

Har yili qariyb 55 mingta grin-karta o‘ynaladi, lotereyada esa millionlab xohlovchilar qatnashadi (aniqrog‘i, har yili qariyb 10 million kishi). Shu tariqa, grin-kartani yutib olish ehtimoli — taxminan 200 ga 1. G‘olib tasodifiy tarzda kompyuter tomonidan aniqlanadi.

Grin-kartani qanday yutib olish mumkin?

AQSH fuqarolik va immigratsiya xizmati rasmiy saytida anketani to‘ldirib, tegishli talablarga javob beruvchi fotosuratni ilova qilish va tasdiqlash kodini olish kerak, u orqali keyin lotereya natijasini bilish mumkin. Unda qatnashish bepul. Arizani har yili berish mumkin.

Yutgandan keyin nima qilish kerak?

Grin-kartani yutib olish — hali hammasi emas. Undan keyin tegishli hujjatlarni topshirish, konsullik yig‘imini to‘llash, elchixonada suhbatdan o‘tish kerak — shundan keyingina AQSHga ketish mumkin bo‘ladi.