Hokimliklar oziq-ovqat mahsulotlari narxlarini pasaytirib ko‘rsatgani sababli yetkazib beriladigan mahsulotlar sifati pasaymoqda. Bu haqda Senat raisi Tanzila Norboyeva davlat bolalar bog‘chalarida ovqatlanishni tashkil etish holati yuzasidan o‘tkazilgan yig‘ilishda aytib o‘tdi, deya xabar bermoqda “Daryo” muxbiri.
Oliy Majlis Senati kengashining navbatdagi majlisida davlat maktabgacha ta’lim tashkilotlarida ovqatlanishni tashkil etish tizimidagi muammolarni o‘rganish bo‘yicha ishchi guruhi oldida turgan vazifalar ko‘rib chiqildi. Yig‘ilishda Senat raisi Tanzila Norboyeva tizimdagi yutuqlar bilan birga, qator kamchiliklarni ham sanab o‘tdi.
“Hokimliklar tomonidan oziq-ovqat mahsulotlarining narxlari pasaytirib qayd etilmoqda. Natijada yetkazib beriladigan mahsulot sifatining pasayishi yoki hajmining kamayishi kuzatilmoqda. Tuman MTB mutaxassislari, davlat MTT direktorlari va boshqa xodimlari ovqatlantirish bilan bog‘liq lavozim majburiyatlarini hamda huquqlarini bilmaydi”, — dedi Senat raisi.
Ma’lum qilinishicha, bog‘chalarda bolalarni autsorsing usulida ovqatlantirishni tashkil etishda qator jiddiy kamchiliklar mavjud. Xususan, ularni nazorat qilish mexanizmlari to‘liq ishlab chiqilmagan. Ovqatlantirish tizimida inson omilining yuqoriligi korrupsiyaning rivojlanishiga sabab bo‘lmoqda.
Yig‘ilishda mas’ul vazirliklarga davlat bog‘chalarida bolalar uchun yagona mavsumiy taomnomalar ishlab chiqish va bir bola uchun sarflanadigan yillik mablag‘ miqdorini hisoblash topshirig‘i berildi.
Izoh (0)