Toshkent shahri Yunusobod tumanidagi klinikada shifokor qabuliga navbatsiz kirgan opa-singil janjal ko‘targani xabar qilingandi. Toshkent shahri sudlarining “Daryo”ga ma’lum qilishicha, ikki ayolga nisbatan sud hukmi o‘qildi.
Ma’lum qilinishicha, 4-may kuni soat 20:30 larda Yunusobod tumanida joylashgan xususiy klinikalardan birida 30 yoshli Y.L. va uning 26 yoshli singlisi Y.X. shifokor ko‘rigiga navbatsiz kirib ketgan. Bundan norozi bo‘lgan navbatda turgan erkak M.S. (1993-yilda tug‘ilgan) e’tiroz bildirgan. Natijada ular o‘rtasida o‘zaro janjal chiqqan.
Mazkur holat yuzasidan Yunusobod tumani IIO FMB Tergov bo‘limi tomonidan Jinoyat kodeksining 277-moddasi (bezorilik) alomati bilan jinoyat ishi qo‘zg‘atilgan.
Shuningdek, ayollar fevral oyida Yunusobod tumanida sodir bo‘lgan yana bir jinoyat bilan ayblangan. Unga ko‘ra, opa-singillar va 1995-yilda tug‘ilgan erkak mazkur tumandagi avtobus bekatida bir fuqaroni urib, unga tan jarohati yetkazgan.
Sud hukmiga ko‘ra, opa-singillar Jinoyat kodeksining 277-moddasi bilan aybli deb topilib, ularga 4 yilga ozodlikni cheklash jazosi tayinlandi.
Izoh (0)