Joriy yil 17—18-avgust kunlari Toshkentda O‘zbekistonning Shanxay hamkorlik tashkilotiga raisligi doirasida tashkilotga a’zo davlatlar ichki ishlar va jamoat xavfsizligi vazirlarining to‘rtinchi kengashi bo‘lib o‘tishi rejalashtirilgan. Bu haqda Markaziy Osiyo xalqaro instituti ma’lumotiga tayanib “Dunyo” axborot agentligi xabar qildi.
Qayd etilishicha, kengashda SHHTga a’zo davlatlarning ichki ishlar va jamoat xavfsizligi vazirliklari, kuzatuvchi davlatlar va xalqaro tashkilotlar, jumladan, INTERPOL, BMTning Narkotik va jinoyatlarga qarshi kurashish boshqarmasi, MDHga a’zo davlatlar hududida uyushgan jinoyatchilik va boshqa xavfli jinoyatlarga qarshi kurashishni muvofiqlashtirish byurosi hamda MDHning Aksilterror markazi delegatsiyalari qatnashadi.
Kengash kun tartibiga ko‘ra, xalqaro va mintaqaviy xavfsizlikni ta’minlash jarayonida hamkorlikni rivojlantirish, giyohvandlik vositalari va psixotrop moddalarning noqonuniy aylanmasi, terrorizm, ekstremizm va separatizm hamda transmilliy uyushgan jinoyatchilikka qarshi kurashish va boshqa masalalar muhokama etiladi.
Tadbir jarayonida delegatsiya rahbarlarining xalqaro hamkorlikni takomillashtirishga bag‘ishlangan ikki tomonlama uchrashuvlari ham rejalashtirilgan.
Mavzuga doir:
Izoh (0)