Yil boshidan beri banklar tomonidan qancha kredit ajratilgani ma’lum qilindi

Banklar tomonidan 2022-yilning yanvar—iyun oylari davomida 87 trln so‘m miqdorida kreditlar ajratilgan. Bu haqda Markaziy bank xabar bermoqda.

Bu ko‘rsatkich o‘tgan yilning mos davriga nisbatan 10 foiz ortgan.

Joriy yilning yanvar—iyun oylarida banklar tomonidan o‘rtacha oylik kreditlar 14,5 trln so‘mni tashkil etgan.

Mazkur kreditlarning 70 foizi (61 trln so‘m) korporativ va 30 foizi (26 trln so‘m) chakana kreditlari hissasiga to‘g‘ri keladi.

Shuningdek, ajratilgan kreditlarning 26 foizi qisqa muddatli va 74 foizi uzoq muddatli, hamda 66 foiz kreditlar milliy valyutada va 34 foiz xorijiy valyutadagi kreditlar hissasiga to‘g‘ri kelgan.

Banklarning jami kredit portfeli 2022-yilning 1-iyul holatiga 344 trln so‘mni tashkil etadi. Ularning 77 foizi korporativ kreditlar, 23 foizi chakana kreditlar.

Jami kredit portfeli qoldig‘i joriy yil boshiga nisbatan 5 foizga yoki 17 trln so‘mga oshgan. Korporativ kreditlar 2 foizga, chakana kreditlar esa 16 foiz ya’ni 11 trln so‘mga o‘sgan.

Chakana kreditlar o‘sishi mikroqarzlar qoldig‘ining 5,7 trln so‘m, ipoteka kreditlarining 4,7 trln so‘mga, ta’lim kreditlarining 436 mlrd so‘mga, avtokreditlarning 422 mlrd so‘mga o‘sishi va boshqa iste’mol kreditlar qoldig‘i 943 mlrd so‘mga kamaygani bilan izohlanadi.

Avvalroq Navoiy kon-metallurgiya kombinati 1,2 mlrd dollar kredit olgani haqida xabar berilgandi.