O‘zbekiston banklari yil boshidan beri qariyb 5 trln so‘m sof foyda ko‘rdi

Banklar tomonidan joriy yilning yanvar—iyun oylari davomida 47,2 trln so‘m daromad olingan. Bu haqda Markaziy bank xabar bermoqda.

Bu davr mobaynida 42,4 trln so‘m xarajatlar amalga oshirilgan va sof foyda 4,8 trln so‘mni tashkil etgan.

Kapital rentabelligi ko‘rsatkichi 13,2 foiz, aktivlar rentabelligi esa 2,7 foiz darajasida shakllangan.

Aktivlar va kapital rentabelligi ko‘rsatkichlari joriy yil fevral va mart oylarida pasayish tendensiyasiga ega bo‘lgan.

Bunga ushbu oylarda kreditlar bo‘yicha yo‘qotishlarga qarshi shakllantirilgan zaxiralar hamda valyuta operatsiyalari bo‘yicha xarajatlar o‘sgani sabab bo‘lsa, keyingi oylarda esa foizsiz daromadlarning keskin o‘sishi hisobiga yaxshilangan.

Bank xodimlarining ish unumdorligini baholovchi operatsion samaradorlik ko‘rsatkichi xalqaro amaliyotda uning maqbul darajasi 50 foiz atrofida qabul qilingan bo‘lib, ushbu ko‘rsatkich bank tizimida 26,3 foizni tashkil etgan.

Tizimning operatsion xarajatlari 6,1 trln so‘mni hamda operatsion daromadlari 23,2 trln so‘mni tashkil qilgan.

Operatsion samaradorlik ko‘rsatkichi yanvar—aprel oylarida o‘sib borish tendensiyasiga ega bo‘lib, banklarning mobayl banking tizimini rivojlantirish, mobil ilovalarni keng joriy etishi va bank dasturiy ta’minotini rivojlantirish uchun yo‘naltirilgan xarajatlarning o‘sib borganligi bilan izohlanadi.

Avvalroq O‘zbekistondagi aeroportlarning umumiy foydasi ma’lum bo‘lgani haqida xabar berilgandi.