Farg‘onada 51 mln so‘mlik parfyumeriya tovarlari noqonuniy olib ketilayotganda to‘xtatib qolindi (foto)
Farg‘ona viloyatida 51 million so‘mlik parfyumeriya tovarlari noqonuniy olib kirilishiga chek qo‘yildi. Bu haqda viloyat bojxona boshqarmasi axborot xizmati xabar berdi.
Qayd etilishicha, boshqarmaning Kontrabandaga qarshi kurashish bo‘limi xodimlari viloyat Milliy gvardiya xodimlari bilan hamkorlikda oldindan olingan ma’lumot asosida tezkor tadbir o‘tkazgan. Tadbir davomida Vodil—Toshloq yo‘nalishida harakatlanayotgan fuqaro F.B. boshqaruvidagi Damas kuzatuvga olinib, Toshloq tumani hududida to‘xtatilib, xolislar ishtirokida ko‘zdan kechirilgsn.
Natijada avtomashina saloni va yukxonasida xorijda ishlab chiqarilgan va bojxona rasmiylashtiruvidan o‘tganini tasdiqlovchi hujjatlari bo‘lmagan, dastlabki qiymati 51 million so‘mdan ziyod 5 turdagi parfyumeriya mahsuloti borligi aniqlangan.
Mazkur holat yuzasidan bojxona organlari tomonidan surishtiruv harakatlari olib borilmoqda.
