AQSH prezidenti Jo Bayden Kongressga Afg‘onistonni NATOdan tashqaridagi asosiy ittifoqchi maqomidan mahrum qilmoqchiligi haqida xabar qildi. Bu haqda Oq uy saytidagi bayonotda aytilgan.
“1961-yilda qabul qilingan tashqi yordam to‘g‘risidagi qonunning o‘zgartirishlar kiritilgan 517-moddasiga muvofiq men Afg‘onistonning NATOga a’zo bo‘lmagan asosiy ittifoqchi maqomini bekor qilish niyatim haqida xabar beraman”, — deyiladi bayonotda.
Qo‘shma Shtatlar 2012-yilda Afg‘onistonni NATOdan tashqaridagi asosiy ittifoqchilar qatoriga kiritgan edi.
2020-yil 29-fevralda AQSH va “Tolibon” harakati Dohada tinchlik shartnomasini imzolagan. Unga ko‘ra, Vashington 2021-yil 1-maygacha Afg‘onistondan barcha qo‘shinlarini olib chiqib ketishga va’da bergan. “Tolibon” esa Afg‘oniston hududidan AQSH va uning ittifoqchilari xavfsizligiga tahdid soladigan faoliyat uchun foydalanmaslikka kafolat bergan.
Bayden ma’muriyati “Tolibon” bilan tuzilgan kelishuvlarni bajarishga qaror qildi, ammo qo‘shinlarni olib chiqish muddatini kechiktirdi. “Tolibon” bu qarorni kelishuvlarni buzish deb hisoblagan.
Mamlakatdagi vaziyat iyul oyida AQSH va NATO qo‘shinlari mamlakatdan olib chiqilishi e’lon qilinganidan keyin keskinlashdi. Amerikaliklar 11-sentabr kuni Afg‘onistonni tark etishi rejalashtirilgan edi, biroq “Tolibon” hukumat qo‘shinlariga bo‘ysunuvchi hududlarni tezlik bilan egallashni boshladi. Qo‘shma Shtatlar o‘z xodimlari va elchixona xodimlarini evakuatsiya qila boshladi
2021-yil avgust oyi o‘rtalarida Afg‘onistonda “Tolibon” hokimiyat tepasiga keldi. Prezident Ashraf G‘ani BAAga qochib ketdi. “Tolibon” hukumat tuzib, Afg‘onistonda islomiy amirlikni qayta tiklash rejalarini e’lon qildi.
O‘sha yilning oktabr oyida Afg‘oniston muvaqqat hukumati tashqi ishlar vaziri Amir Xon Mutaki “Tolibon” xalqaro hamjamiyat tomonidan Afg‘onistonning qonuniy hukumati sifatida tan olinishi uchun barcha shartlarni bajarganini aytdi.
2022-yilning fevral oyida Amir Xon Mutaki AQSH rasmiylari Afg‘onistonning yangi hukumati vakillarini haligacha qora ro‘yxatlardan chiqarmaganini aytdi. Shu bilan birga, vazir afg‘on rasmiylari o‘z va’dalarida turishiga va o‘z mamlakati hududidan AQSHga qarshi foydalanishga yo‘l qo‘ymasligiga ishontirdi.
Izoh (0)