“Bu bosqinning butunlay muvaffaqiyatsizligidan dalolat beradi” — Zelenskiy Rossiyaning “mo‘jizaviy qurol” bilan tahdidlari haqida (video)

Rossiya bosqinchilarining urushda hech qanday imkoniyati yo‘qligi qanchalik aniq bo‘lsa, urushda go‘yoki burilish nuqtasini ta’minlay oladigan darajada kuchli “mo‘jizaviy qurol” haqidagi propaganda gaplar shunchalik ko‘p bo‘ldi. Bu haqda Ukraina prezidenti Vladimir Zelenskiy 18-maydagi kechki murojaatida aytib o‘tdi.

“Mana ko‘rib turibmizki, uchinchi oyda Rossiya o‘zining ‘mo‘jizaviy quroli’ni topishga urinmoqda. Go‘yoki bu lazerli bo‘ladi. Bularning barchasi bosqinning butunlay muvaffaqiyatsizligini yaqqol ko‘rsatadi. Ammo bu yana shundan dalolat beradiki, Rossiyada davlat va harbiy darajadagi halokatli xatolarga yo‘l qo‘yilganini tan olishdan qo‘rqishmoqda, shuning uchun Ukraina Qurolli Kuchlari va himoyachilarimiz yerimizni bosqichma-bosqich ozod qiladigan bir vaqtda, ular ‘mo‘jizaviy qurollar’ni o‘ylab topadi”, — dedi prezident.

Zelenskiyning so‘zlariga ko‘ra, “bu qancha davom etadi?” degan savolga javobni faqatgina jang maydonidagi asl vaziyat berishi mumkin.

“Biz imkon qadar tezroq tugatishga harakat qilyapmiz. Bu aniq. Bosqinchilarni quvib chiqarishga va Ukrainaga haqiqiy xavfsizlikni kafolatlashga majburmiz”, — deya so‘zini yakunladi prezident.

18-may kuni Rossiya bosh vaziri o‘rinbosari Yuriy Borisov davlat Ukrainada 5 kilometr masofadagi nishonlarni urishga qodir bo‘lgan “Zadira” lazerli qurol tizimlaridan foydalanayotganini aytgandi.

Rossiyaning Ukrainaga qarshi urushda raketalarni tejash uchun lazer qurolidan foydalanish haqidagi bayonoti rus armiyasi tomonidan Ukrainaga qarata otilgan ikki mingdan ortiq raketalar Rossiya zaxiralarining asosiy qismini tashkil qilganidan dalolat beradi, deb ta’kidlagan “TSN” nashri.