O‘zbekistonda mahkumlarning koloniyadagi ish stajini umumiy stajga qo‘shib hisoblash tartibi joriy etilishi mumkin

Ichki ishlar vazirligi “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasini muhokamaga qo‘ydi.

Loyiha bilan “Fuqarolar davlat pensiya ta’minoti to‘g‘risida”gi qonuning 37-moddasini ikkinchi qismi quyidagicha to‘ldirilishi mumkin: “ozodlikdan mahrum etishga hukm qilingan shaxslar tomonidan jazoni ijro etish muassasalarida jazo muddatini o‘tash davrida bajarilgan har qanday ish, agar ushbu ish uchun ijtimoiy soliq to‘langan bo‘lsa”.

“Keksalar, nogironlar va aholining boshqa ijtimoiy ehtiyojmand toifalari uchun ijtimoiy xizmatlar to‘g‘risida”gi qonunga esa quyidagicha o‘zgartirish va qo‘shimchalar kiritilmoqda:

• 6-modda oltinchi xatboshidagi “aholining ijtimoiy ehtiyojmand toifalaridir” degan so‘zlar chiqarib tashlanadi. Yettinchi xatboshi bilan esa “ozodlikdan mahrum etish tarzidagi jazoni o‘tab bo‘lgan shaxslar aholining ijtimoiy ehtiyojmand toifalaridir” jumlasi bilan;
• 13-modda oltinchi xatboshi “ozodlikdan mahrum etish tarzidagi jazoni o‘tab bo‘lgan shaxslarga “Dastlabki ijtimoiy-moddiy yordam paketi”ni berish bilan bog‘liq xizmatlar” jumlasi bilan to‘ldiriladi.

Shuningdek, ijtimoiy xizmatlar ko‘rsatish shakllariga ozodlikdan mahrum etish tarzidagi jazoni o‘tab bo‘lgan shaxslarga “Dastlabki ijtimoiy-moddiy yordam paketi”ni berish bilan bog‘liq xizmatlar toifasi qo‘shilib, alohida modda sifatida yoritib berilmoqda.

“Dastlabki ijtimoiy-moddiy yordam paketi”ni berish bilan bog‘liq xizmatlar quyidagi turlarni o‘z ichiga oladi:

• ijtimoiy xizmatlar ko‘rsatish masalalari bo‘yicha maslahatlar berish, ijtimoiy xizmatlar ko‘rsatuvchi tegishli organlar va tashkilotlarga yo‘naltirish;
• maxsus psixologik yordam ko‘rsatish;
• bandlikka ko‘maklashish, shu jumladan o‘zining tadbirkorlik, me’morchilik, hunarmandchilik kabi yo‘nalishlarda aniq loyihalarini taqdim etib, mustaqil faoliyatni boshlamoqchi bo‘lgan fuqarolarga bir martalik moddiy yordam berish;
• birinchi tibbiy yordam ko‘rsatish, dispanser ko‘rigidan o‘tkazish, zarur bo‘lgan hollarda statsionarda davolanish uchun yuborish, tibbiy ko‘rsatmalarga ko‘ra dori vositalari, protez-ortopediya buyumlari va reabilitatsiya texnik vositalari bilan ta’minlash.

Avvalroq O‘zbekistonda tergovda qiynoqqa solingan shaxslarga zararni davlat to‘lab berishi belgilangan edi. Unga ko‘ra, tergovga qadar tekshiruv, surishtiruv, dastlabki tergov, prokuratura organlari va sud tomonidan shaxsga nisbatan har qanday qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash natijasida yetkazilgan zarar davlat tomonidan to‘la hajmda qoplab beriladi.