Lautaro Martines yozda “Inter”ni tark etishi mumkin.
La Repubblica nashrining xabariga ko‘ra, hujumchiga “Atletiko Madrid” qiziqish bildirmoqda. “Matraschilar” bosh murabbiyi Diyego Simeone rahbariyatdan 24 yoshli futbolchini jamoaga olib kelishni so‘ragan. Rahbariyat murabbiyning talabini bajarishga rozi, ammo futbolchi uchun “Inter”ga 60 million yevro to‘lamoqchi emas.
Shuningdek, Martinesning o‘zi ham jamoani tark etishi mumkinligini inkor qilmagan, chunki u “nerazzurilar”ning loyihasida o‘zini asosiy o‘rinlarda ko‘rmayapti.
“Inter” ham Lautaroning ketishiga qarshi emas. Milanliklar “Yuventus” hujumchisi Paulo Dibala variantini ko‘rib chiqmoqda. Bundan tashqari, “Sassuolo” yarim himoyachisi Davide Frattezi va hujumchi Janluka Skamakka ham “Inter” nishonida bo‘lib turibdi.
Avvalroq Martinesning koronavirusga chalingani va Argentina terma jamoasining mart oyidagi o‘yinlarini o‘tkazib yuborishi haqida xabar berilgandi.
Ma’lumot uchun, Martines 2018-yildan beri “Inter” sharafini himoya qilib keladi. U 2021/22-yilgi mavsumda barcha musobaqalarda 39 o‘yinda maydonga tushib, o‘z hisobiga 16 ta gol va 2 ta golli uzatma yozdirib qo‘ydi.
