Toshkentdagi “O‘zbekiston” xalqaro anjumanlar saroyida Shavkat Mirziyoyevning sog‘liqni saqlash sohasi vakillari bilan “O‘zbekiston tibbiyoti — inson qadri uchun” mavzusidagi ochiq muloqoti bo‘lib o‘tmoqda, deb xabar bermoqda “Daryo” muxbiri.
Shavkat Mirziyoyev bugungi ochiq muloqotga tayyorgarlik jarayonida kelib tushgan muammolarning yechimlari va bugungi takliflar bo‘yicha qisqa muddatda qarorlar qabul qilinishini ta’kidlagan.
“Ularda barcha taklif va tashabbuslar, shuningdek, bugun bildiriladigan fikr-mulohazalar ham o‘z aksini topadi. Bu maqsadlar uchun 2022-yilda budjetdan sohaga ajratilgan 24 trillion so‘mga qo‘shimcha 3,2 trillion so‘m berish bo‘yicha hisob-kitoblar qilingan. Barchangiz tushunasiz, hozir dunyoda sodir bo‘layotgan murakkab vaziyatda, sog‘liqni saqlash tizimi uchun bunday katta mablag‘larni izlab topish, albatta, oson bo‘layotgani yo‘q. Biz xalqimiz salomatligi uchun har qancha mablag‘ va kuch-imkoniyat sarflashga tayyormiz. Shaxsan men uchun xalqimiz salomatligi hamma narsadan ustun va qadrli”, — deydi Shavkat Mirziyoyev.
Shuningdek, Shavkat Mirziyoyev “bemorlarni faqat dori bilan emas, balki mehr bilan, aql bilan davolash ham muhim ahamiyatga ega ekanligini” qayd etgan.
“Ming afsuski, sog‘liqni saqlash muassasalarida ayrim shifokorlarning aholi bilan qo‘pol muomalada bo‘lishi, odamlarni mensimaslik, o‘z vazifasini suiiste’mol qilishi kabi salbiy holatlar hamon uchrab turibdi. Bunday vaziyatni o‘zgartirish uchun, avvalo, tibbiyot xodimlarining ma’naviy dunyosini, bemorlar bilan muloqot madaniyatini yuksaltirish zarur. O‘ylaymanki, bu so‘zlar avvalambor sizlarga – tibbiyot ahliga qarata aytilgan. Shaxsan men, prezident sifatida, sizlarning mashaqqatli mehnatingizni yuksak qadrlayman. Qolaversa, shifokorning farzandi bo‘lganimdan g‘ururlanaman”, — deydi prezident.
“Sizlarni teatr va muzeylarda, konsert zallari va kutubxonalarda yanada ko‘proq ko‘rishni istayman. Shu maqsadda, respublikamiz tibbiyot xodimlarini davlat hisobidan teatr va konsertlarga bepul olib borish tizimi tashkil etiladi”, — deydi Shavkat Mirziyoyev.
Avvalroq Shavkat Mirziyoyev turli tibbiy sug‘urta shakllarini rivojlantirish uchun konstitutsiyaviy asos yaratish kerakligi, hozirda tug‘ma yurak nuqsoni bor bolaning operatsiyasi uchun mablag‘ davlat tomonidan to‘liq qoplanayotgani haqida gapirgandi.
Mavzuga doir:
- “Oilaviy poliklinikalarda ish vaqti soat 20:00 gacha uzaytiriladi. Ularda ishlaydigan xodimlarga qo‘shimcha ustama to‘lanadi” — Shavkat Mirziyoyev
- O‘zbekistonda tibbiyot xodimlarining oylik maoshi kamida 10 foizga oshiriladi
- O‘zbekiston tez tibbiy yordam tizimidagi barcha Damas’lar 2025-yilgacha zamonaviy avtomobillarga almashtiriladi
Izoh (0)