Belarusda konstitutsiyani o‘zgartirish bo‘yicha referendum bo‘lib o‘tmoqda. O‘zgarishlar Lukashenkoga yana ikki marta saylanish imkonini beradi

Belarusda bugun, 27-fevral kuni mamlakat Konstitutsiyasiga o‘zgartirishlar kiritish bo‘yicha referendumning asosiy kuni boshlandi. 22—26-fevral kunlari muddatidan oldin ovoz berish bo‘lib o‘tgandi. Bugun saylov uchastkalari Minsk vaqti bilan 08:00 dan 20:00 gacha ochiq bo‘ladi.

Ovoz berish byulletenida faqat bitta savol bor: “Siz Belarus Respublikasi Konstitutsiyasiga kiritilgan o‘zgartirish va qo‘shimchalarni qabul qilasizmi yoki yo‘q?”. Referendumda qabul qilingan qaror rasman e’lon qilinganidan keyin 10 kun o‘tib kuchga kiradi.

Saylovchilar ro‘yxatiga mamlakatning 6 million 818 ming 948 nafar fuqarosi kiritilgan bo‘lib, bu 2020-yilgi prezidentlik sayloviga nisbatan 26 ming kishiga kam. Respublika bo‘yicha 5,5 mingta uchastka komissiyalari va a’zolarning ro‘yxati tuzilgan. Belarusdan tashqarida saylov uchastkalarini ochmaslikka qaror qilindi. Ovoz berishda Yevropada Xavfsizlik va Hamkorlik Tashkiloti kuzatuvchilari bo‘lmaydi, deyiladi xabarda.

Belarus konstitutsiyasiga kiritilgan barcha o‘zgartirish va qo‘shimchalar Aleksandr Lukashenkoning 2022-yil yanvardagi farmonida taqdim etilgan. Ular orasida bir shaxsning ikki muddatdan ortiq mamlakat prezidenti bo‘lishini taqiqlash taklif qilingan. Bundan kelib chiqadiki, o‘zgarishlar kuchga kirgandan so‘ng, yangi konstitutsiyaga muvofiq Lukashenko yana ikki marta davlat rahbari etib saylanish imkoniga ega bo‘ladi. Amaldagi konstitutsiyada esa hech qanday cheklovlar yo‘q.