Video: Toshkentda yo‘lovchi tashishni boshlagan elektrobuslar

Toshkent shahri jamoat transportida elektrobuslar harakati yo‘lga qo‘yildi. Bu haqda Transport vazirligi xabar qildi.

Qayd etilishicha, 51-sonli Yunusobod mavzesi 6-daha—Beshyog‘och maydoni avtobus yo‘nalishida YUTONG elektrobusi harakati boshlangan. Elektrobuslarning ish vaqti 05:30 dan 22:30 gacha belgilangan. Mazkur yo‘nalishda 8 ta elektrobus yo‘lovchilarga xizmat ko‘rsatmoqda. Kunning tig‘iz vaqtlarida elektrobuslar harakati oraliq intervali 10-11 daqiqa hisoblanadi.

Toshkent shahar hokimi Jahongir Ortiqxo‘jayev va “Belkommunmash” rahbari Vladimir Korol o‘rtasida 2018-yil sentabrida bo‘lib o‘tgan muzokaralar yakuniga ko‘ra, Belarus elektrobuslaridan birini Toshkentda sinab ko‘rish bo‘yicha kelishuvga erishilgan edi. 450 ming dollarga xarid qilingan birinchi elektrobus Toshkentda 2019-yilning 13-sentabridan harakatlanishni boshlagandi. 2020-yilning mart oyidan boshlab esa Toshkentning 51-avtobus yo‘nalishi (Beshyog‘och—Yunusobod) bo‘ylab Xitoyning YUTONG elektrobusi sinov tariqasida qatnay boshlagandi.

Eslatib o‘tamiz, “Toshkent shahar jamoat transporti tizimini yanada rivojlantirishga doir qo‘shimcha chora-tadbirlar to‘g‘risida”gi prezident qarori qabul qilingandi. Unga ko‘ra, jamoat transportining harakatlanishidagi oraliq vaqti 2 barobarga kamaytiriladi.