FIFA “Buxoro” jamoasiga transfer taqiqi belgiladi. Bu haqda PFL matbuot xizmati ma’lum qildi.
FIFA Nizolarni hal etish palatasi “Buxoro” futbol klubi va uning sobiq darvozaboni turkmanistonlik Rahat Japarov o‘rtasidagi nizoli vaziyat yuzasidan qaror chiqarib, klubga futbolchi oldidagi belgilangan qarzdorlikni to‘lash vazifasini yuklagan.
2021-yilning dekabr oyida esa FIFA qaror asoslarini klubga yuborib, “Buxoro” futbol klubi zimmasidagi qarzdorlik to‘lovini belgilangan muddatda to‘lashi lozim ekanini yana bir bor ma’lum qilgan. Agar qaror chiqqan sanadan boshlab, 45 kun muddat ichida moliyaviy majburiyatlar bajarilishi ta’minlanmasa, klubga nisbatan milliy va xalqaro miqyosda yangi futbolchilarni ro‘yxatdan o‘tkazish bo‘yicha taqiq qo‘yilishi bildirilgan edi.
FIFA mazkur qaror ijrosi ta’minlanmagani bois “Buxoro” futbol klubi uchun transfer taqiqini kuchga kiritdi. Endilikda “Buxoro” Rahat Japarov bilan bog‘liq nizoli vaziyatni hal etmaguncha yangi futbolchilarni ro‘yxatdan o‘tkaza olmaydi.
Japarov 2021-yilning 10-yanvar sanasida erkin agent sifatida “Buxoro” bilan shartnoma imzolagan. 2021-yilning avgust oyida jamoani tark etgan. U jamoa safida ikki marta O‘zbekiston Kubogi musobaqasida maydonga tushgan va 3 ta to‘p o‘tkazib yuborgan.
Avvalroq FIFA “Nasaf” klubi va fransiyalik futbolchi Abdelaye Diakite o‘rtasidagi nizoli vaziyat tufayli Qarshi jamoasiga transfer taqiqini qo‘ygandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)