O‘zbekiston 2022-yilda to‘qqizta yangi bosh konsulxonalarini ochishni rejalashtirmoqda. Bu haqda “Yangi O‘zbekistonning 2022–2026-yillarga mo‘ljallangan taraqqiyot strategiyasi to‘g‘risida”gi prezident farmoni loyihasida so‘z boradi. Ta’kidlanishicha, ularning beshtasi Rossiyaning turli shaharlarida joylashadi.
Hujjat loyihasida O‘zbekistonning xorijdagi diplomatik vakolatxonalari va konsullik muassasalarining xizmat ko‘rsatish qamrovini kengaytirish ko‘zda tutilgan. Bunda:
- Rossiyaning Samara, Astraxan, Tula, Kaliningrad va Nijniy Novgorod, Qozog‘istonning Chimkent, Chexiyaning Praga, Kanadaning Ottava, Janubiy Koreyaning Pusan shaharlarida O‘zbekistonning bosh konsulxonalari ta’sis etiladi;
- O‘zbekistonning Rossiyadagi bosh konsulxonalari (Sankt-Peterburg, Vladivostok, Qozon, Rostov-Don, Novosibirsk va Yekaterinburg), AQShning Nyu-York, Germaniyaning Frankfurt-Mayn va Turkiyaning Istanbul shaharlarida joylashgan bosh konsulxonalari xodimlari soni oshiriladi;
- Rossiyaning Moskva shahridagi, Polshaning Varshava shahridagi va Birlashgan Arab Amirliklaridagi elchixonalar shtat jadvallariga bittadan yangi konsul shtat birligini kiritiladi.
Izoh (0)