Zarina Nizomiddinovaning xolavachchasi, Davron Kabulovning bojasi: Qarindosh ekanini ko‘pchilik bilmaydigan o‘zbek shou-biznesi vakillari (foto)

O‘zbek shou-biznesida bir-biri bilan qarindoshlik rishtalarini bog‘lagan ijodkorlar ko‘plab topiladi. Quyida bir-biriga qarindosh ekanini ko‘pchilik bilmaydigan mashhurlar haqida so‘z yuritamiz.

Xosiyat Husanova va Jahongir Teshaboyev

O‘zbekistonda xizmat ko‘rsatgan artist Xosiyat Husanova yolg‘iz qizini yosh aktyor Jahongir Teshaboyevga turmushga bergan. Bu aktyor tomoshabinlarga “Qadam” serialidagi salbiy roli bilan yaxshi tanish. Hozirda juftlikning bir yoshli o‘g‘illari bor.

Zuhra Ashurova va Madina Muxtorova

O‘zbekiston xalq artisti Zuhra Ashurova hamkasbi Madina Muxtorovaga kelinoyi hisoblanadi. Ya’ni Zuhra Ashurovaning turmush o‘rtog‘i Qahramon Ashurov Madina Muxtorovaning akasidir.

Aziza Begmatova va Izzat Shukurov

Xonanda Izzat Shukurovning otasi bir paytlar mashhur “Toj” guruhining solisti bo‘lgan Tojiboy Shukurov ekani barchaga ma’lum. Ammo Izzat Shukurovning ona tomondan buvisi O‘zbekiston xalq artisti ekanini ko‘pchilik bilmasligi aniq. U o‘zbekning chechasi bo‘lgan aktrisa Aziza Begmatovaning suyukli nabiralaridan biri hisoblanadi.

Kamola Oripova va Zarina Nizomiddinova

Instagram’da millionlab kuzatuvchilariga ega bloger Kamola Oripova aktrisa Zarina Nizomiddinova bilan xolavachcha hisoblanadi.

Oybek Sultonov va Shahzod Sultonov

Yoshlarning sevimli aktyori bo‘lgan Shahzod Sultonov bir paytlar “Zilola” qo‘shig‘i bilan tanilgan xonanda Oybek Sultonovning o‘g‘li.

Ismoilovalar oilasi va Baxtiyor Yusupov

Mahmud va Shohida Ismoilovalarning uch nafar qizlari bor. Ularning kuyovlaridan biri O‘zbek Milliy akademik drama teatrining aktyori Baxtiyor Yusupovdir.

Javlon Shodmonov va Rashid

“Via Marokand” guruhi xonandasi Rashid prodyuseri Javlon Shodmonovning qaynukasi bo‘ladi. Garchi Rashid ishda qarindosh-urug‘chilikka yo‘l qo‘yilmasligini ta’kidlasa-da, uning guruhga qabul qilinishi shunchaki tasodif emas.

Doniyor Hafizov va Asal Zokirova

“Via Marokand”ning yakkaxoni Asal Zokirova esa aktyor va rejissor Doniyor Hafizovning singlisi bo‘ladi. Yodingizda bo‘lsa, bir necha yillar avval Doniyor Hafizov “Navo” guruhiga asos solgandi. Ammo guruh faoliyati uzoqqa cho‘zilmagan.

Davron Kabulov va Jamshid Umarov

Davron Kabulov “Afro‘z” guruhi xonandasi Jamshid Umarovning bojasi bo‘ladi. Jamshid oilaning to‘ng‘ich qiziga,  Davron Kabulov esa kenja qiz E’zozaxonga uylangan.

Asliddin va Xonzoda Do‘stova

“Aktyor shou” loyihasida muvaffaqiyatli ishtirok etgan aktrisa va model Xonzoda Do‘stova ham san’atkorning farzandi. Uning otasi xonanda Asliddin Do‘stov hisoblanadi. Ammo yosh aktrisa negadir buni sir tutadi.

Munavvara Abdullayeva va Dildora Umarova

“Alpomish” filmidagi Oybarchin roli bilan tomoshabinlarga tanish bo‘lgan aktrisa Dildora Umarova O‘zbekistonda xizmat ko‘rsatgan yoshlar murabbiyi Munavvara Abdullayevaning qizi hisoblanadi. U aktrisalik  faoliyatidan tashqari, onasi singari yosh iste’dod egalariga saboq beradi.

Diyor Bekjonov va Jahongir Xo‘jayev

“Aristokratlar shou”si bilan tomoshabinlarga yaxshi tanish bo‘lgan Diyor Bekjonov do‘sti Jahongir Xo‘jayev bilan munosabatlarini yanada mustahkamlash maqsadida uning xolavachchasi bilan oila qurgan. Bundan ayonki, Bekjonovlar va Asalxo‘jayevalar oilasi qudalar hisoblanadi.

Samandar va Sevara Hamroqulova

Samandar va Iskandar Hamroqulovlarning yolg‘iz singlisi Sevara ham san’at sohasida faoliyat yuritadi. U ayni kunda O‘zbekiston davlat satira teatrida faoliyat yuritadi. Film va seriallarda ham katta-kichik rollarni ijro etadi.