Buxoroda 168 o‘rinli Prezident maktabi foydalanishga topshirildi

Buxoro shahrida ham 168 o‘ringa mo‘ljallangan Prezident maktabining qurilish ishlari yakunlanib, foydalanishga topshirildi. Bu haqda “Yangi Davr” informatsion dasturida xabar qilindi.

Ma’lum qilinishicha, muassasa 2 gektar yer maydonida qurilgan. Maktab 2 qavatli o‘quv binosi, 3 qavatli yotoqxona, zamonaviy mehmonxona, gimnastika va sport zallari, suv havzasi va oshxona, shuningdek, dars tayyorlash xonalaridan iborat.

Ta’kidlanishicha, o‘quvchilarga mahalliy o‘qituvchilardan tashqari Buyuk Britaniya, Yangi Zelandiya, AQShlik mutaxassislar dars beradi. Sinfxonalar elektron doskalar bilan jihozlangan, darslar ingliz va o‘zbek tillarida olib boriladi. Darslardan so‘ng o‘quvchilar turli to‘garaklarga qatnaydi.

Qayd etilishicha, 2021/2022-o‘quv yili uchun 6000 nafardan ortiq talabgor hujjat topshirgan. Ular ikki bosqichli imtihonda saralangan va yakunda 144 nafar o‘quvchi maktabga qabul qilingan.

Eslatib o‘tamiz, oktabr—noyabr oylarida Andijon, Farg‘ona, Qashqadaryo va Navoiy viloyatlarida Prezident maktablari ochilgandi.