Qozog‘iston prezidenti Qosim-Jo‘mart To‘qayev ham 25-oktabr kuni Shavkat Mirziyoyevni saylovdagi g‘alabasi bilan tabrikladi. Bu haqda Oqo‘rda matbuot xizmati xabar berdi.
“Prezident Qosim-Jo‘mart To‘qayev Shavkat Mirziyoyevni O‘zbekiston prezidenti lavozimiga qayta saylangani bilan iliq tabrikladi. Uning strategik yo‘nalishi kuchli umumxalq qo‘llab-quvvatlanayotganini yana bir bor namoyon etganini ta’kidladi”, — deyilgan xabarda.
Qayd etilishicha, telefon orqali bo‘lib o‘tgan suhbat davomida Qosim-Jo‘mart To‘qayev Shavkat Mirziyoyevning ikki qardosh xalq o‘rtasidagi ko‘p asrlik do‘stlik va yaxshi qo‘shnichilik rishtalarini mustahkamlashga qo‘shgan shaxsiy hissasini alohida ta’kidlagan.
Tomonlar O‘zbekiston va Qozog'iston va o‘rtasidagi strategik sheriklikning ulkan salohiyatini to‘liq ro‘yobga chiqarish, shuningdek Markaziy Osiyoda ishonch muhitini mustahkamlash uchun birgalikdagi faol ishlarni davom ettirishga tayyorligini bildirgan.
Qozog‘iston—O‘zbekiston munosabatlariga amaliy turtki berish uchun Qosim-Jo‘mart To‘qayev Shavkat Mirziyoyevni davlat tashrifi bilan Qozog‘istonga taklif qildi.
Qayd etish joiz, Qosim-Jo‘mart To‘qayev Shavkat Mirziyoyevni Markaziy saylov komissiyasi prezident saylovining dastlabki natijalarini e’lon qilgunga qadar tabrikladi. Bundan avval Rossiya prezidenti Vladimir Putin, Belarus prezidenti Aleksandr Lukashenko ham Shavkat Mirziyoyevga qo‘ng‘iroq qilib, uni saylovdagi ishonchli g‘alabasi bilan tabrikladi va rejalarini amalga oshirishda muvaffaqiyatlar tiladi.
Markaziy saylov komissiyasi tomonidan e’lon qilingan saylovning dastlabki natijalariga ko‘ra, amaldagi prezident Shavkat Mirziyoyev saylovchilarning 80,1 foiz ovozini to‘plagan.
Izoh (0)