19-oktabr kuni O‘zbekiston tashqi ishlar vaziri Abdulaziz Komilov Yevropa Ittifoqining Tashqi ishlar va xavfsizlik siyosati bo‘yicha oliy vakili, Yevropa Komissiyasi vitse-prezidenti Jozep Borrel bilan telefon orqali muloqot qildi, deb xabar beradi TIV matbuot xizmati.
Ta’kidlanishicha, muzokaralar chog‘ida O‘zbekiston va Yevropa Ittifoqi o‘rtasidagi ikki tomonlama hamkorlikni rivojlantirish istiqbollari hamda “Yevropa Ittifoqi—Markaziy Osiyo” va “O‘zbekiston—Yevropa Ittifoqi” shaklida bo‘lib o‘tadigan tadbirlar muhokama qilingan.
Bundan tashqari, Afg‘onistondagi bugungi vaziyat yuzasidan fikr almashilgan. Yevropa tomoni O‘zbekistonning qo‘shni mamlakatda tinchlik va barqarorlikni o‘rnatishga ko‘maklashish hamda afg‘on xalqiga gumanitar yordam ko‘rsatishga qaratilgan chora-tadbirlarini yuqori baholagan.
Eslatib o‘tamiz, 7-oktabr kuni O‘zbekiston tashqi ishlar vaziri Abdulaziz Komilov boshchiligidagi delegatsiya Afg‘oniston muvaqqat hukumat rahbarining siyosiy masalalar bo‘yicha o‘rinbosari Mulla Abdul Kabir boshchiligidagi Afg‘oniston rahbariyati vakillari bilan muzokaralar o‘tkazgandi. Uchrashuv davomida tomonlar yaqin orada Termiz shahrida savdo-iqtisodiy masalalarni, jumladan, Surxon — Puli-Xumri elektr uzatish tarmoqlari va Mozori-Sharif—Kobul—Peshovar yo‘nalishi bo‘ylab temiryo‘l qurish loyihalarini amalga oshirish masalalarini muhokama qilish uchun qo‘shma muzokaralar o‘tkazish to‘g‘risida kelishib olgandi. 16-oktabr kuni esa O‘zbekiston va Afg‘onistonning yangi hukumati munosabatlarni rivojlantirish bo‘yicha “yo‘l xaritasi” ishlab chiqishi ma’lum bo‘ldi.
Izoh (0)