Navoiydagi YPX maskanida qariyb 1 tonna go‘sht mahsulotlarini veterinariya-sanitariya talablariga zid ravishda Toshkentdan Xorazmga olib ketayotgan Isuzu va Ford avtotransport vositalari to‘xtatildi. Bu haqda MY5 telekanalining “Markaziy studiya” axborot dasturida ma’lum qilindi.
Ma’lum qilinishicha, Navoiy viloyati IIB YHXB hamda Patrul-post xizmati va Jamoat tartibini saqlash boshqarmasi karantin tadbirlarini ta’minlash guruhi xodimlari tomonidan tezkor tadbir o‘tkazilgan. Tadbir davomida 1 tonnaga yaqin go‘sht mahsulotlarini tashish qoidalariga zid ravishda Toshkent shahridan Xorazm viloyatiga olib ketayotgan, Navoiyga kelguniga qadar 5 ta muntazam YPX maskanidan o‘tgan mashinalar to‘xtatilgan.
“Men davlatga pul to‘lab o‘tirgandan keyin, nima ortsa, shuni tashiyman. Sotadimi, yoqib tashlaydimi, itga, mushukka beradimi, menga uning qizig‘i yo‘q”, — deydi haydovchilardan biri.
Viloyat Veterinariya va chorvachilikni rivojlantirish boshqarmasi laboratoriyasi tomonidan amalga oshirilgan tekshiruv davomida mazkur go‘shtlar iste’molga yaroqsiz deb topilgan. Avtotransport haydovchilariga nisbatan esa tegishli tartibda bayonnoma rasmiylashtirilgan.
Avvalroq Qashqadaryoda Toshkentga olib ketilayotgan iste’molga yaroqsiz 200 kilo go‘sht aniqlangani, Toshkent viloyatidagi dehqon bozorida iste’molga yaroqsiz 140 kilo go‘sht va 30 litr sut yo‘q qilingani, Buxorodan Toshkentga kelib chiqishi noma’lum bo‘lgan 900 kilo go‘sht olib ketilayotgani aniqlangani to‘g‘risida xabar berilgandi.
Izoh (0)