Apple CarPlay’ni yangi darajaga olib chiqish imkonini beradigan yangi loyiha ustida ish olib bormoqda. Interfeysni iPhone bilan integratsiya qiluvchi tizim ko‘plab funksiyalarni boshqara oladi, masalan, salondagi iqlim-nazorat va o‘rindiq qurilmalarini. Bugungi kunda IronHeart shartli nomiga ega loyiha dastlabki bosqichda turibdi, deb xabar beradi Motor.
Foto: Depositphotos
Manbalarning ma’lum qilishicha, tizim avtomobil ichi va tashqarisidagi haroratni o‘lchashga, audiotizim, o‘rindiqlar elektr uzatmalari va tirsakosti tizimlarini boshqarish imkoniyatiga ega, shuningdek, spidometr va taxometrni, yonilg‘i darajasini kuzatadi.
Shunday qilib, tayyorlanayotgan CarPlay versiyasi deyarli butun avtomobilni egallaydi hamda Apple interfeysi va o‘rnatilgan tizim o‘rtasida biridan ikkinchisiga o‘tish zaruratini bartaraf etadi. Bu kabi qadam iPhone egalari uchun mashina bilan o‘zaro aloqani yanada qulaylashtiradi, biroq Bloomberg’ning hisoblashicha, u avtomobil ishlab chiqaruvchilar orasida kutilganidek mashhurlikka erishmaydi.
2014-yilda taqdim etilgan CarPlay tizimini hozirda 600 ta avtomobil qo‘llab-quvvatlaydi. U bundan oldin ham axborot-ko‘ngilochar funksiya chegarasidan chiqishga uringan: 2019-yilda yangilangan CarPlay raqamli qurilmalar paneli bilan ishlashni boshlagan, 2020-yilda esa iPhone yoki Apple Watch soatlari yordamida avtomobil qulfini ochish imkonini beradigan CarKey ishga tushirilgan. Bundan tashqari, iPhone elektrokar turgan joy va undagi batareya quvvati darajasini kuzatishni o‘rganib olgan.
Avtokompaniyalar Apple’ga barcha yangi tizimlarni nazorat ostiga olishiga ruxsat beravermaydi. CarPlay imkoniyatlaridan faqatgina bir nechta marka foydalanib keladi, jumlasan, BMW va Volkswagen.
Avvalroq Apple’ning birinchi avtomobili 2024-yildan oldin taqdim etilmasligi ma’lum bo‘lgandi — kompaniyaga ishlab chiqarishni noldan boshlab yo‘lga qo‘yish uchun vaqt kerak.
