iPhone 14 seriyasi taqdim etilishiga hali bir yilga yaqin vaqt bor, ammo internetda lineykaning keyingi avlod modellari haqida ma’lumotlar tarqalib ulgurdi, deb xabar beradi Hi-Tech.Mail.ru.

Foto: Gizmochina

2021-yilda Apple iPhone 13 ning maksimal xotira sig‘imini ikki barobar oshirdi: Pro va Pro Max modellari ichki xotirasi 1 terabaytga teng holda taqdim etildi. GSMarena manbasiga ko‘ra, iPhone 14 lineykasidan 2 terabayt xotiraga ega modellar o‘rin oladi.

Manbada aynan qaysi modellar haqida gap ketayotganiga oydinlik kiritilmagan, biroq Apple rostdan ham 2 terabaytli xotirani taklif etishni rejalashtirayotgan bo‘lsa, ular Pro versiyalarga o‘rnatilishi mumkin. Qolgan iPhone’lar xotirasi esa 512 gigabaytdan 1 terabaytgacha oshiriladi.

Taxminlarga ko‘ra, Apple o‘z qurilmalaridagi xotira sig‘imi ular kameralarning yangi funksiyalarini qo‘llab-quvvatlashi uchun oshirmoqda. Chunki 2021-yilgi Pro va Pro Max modellarida ProRes formatda soniyasiga 30 ta kadrda 4K sifatli videoni tasvirga olish uchun kamida 256 gigabayt talab etiladi. 128 gigabaytli xotiraga ega modellarda bu 1080p ga qadar cheklangan.

Avvalroq amerikalik shifokor iPhone 13 Pro Max’ning kamerasidan ko‘z kasalliklariga tashxis qo‘yishda foydalanib ko‘rgani to‘g‘risida xabar berilgandi.