CollectingCars onlayn-auksionida Nissan Silvia S14 ning 30 nusxada yaratilgan Nismo 270R modifikatsiyalaridan biri sotuvga qo‘yildi. Sportkar 1994-yildan buyon 128 ming kilometr yo‘l bosgan bo‘lib, zavoddan chiqqandagi ehtiyot qismlarini saqlab qolgan. Ayni vaqtda cheklangan nusxadagi model 42,250 dollarga baholanmoqda, deb xabar beradi Motor.
Nissan Silvia S14 ning Nismo 270R modifikatsiyasi 1994-yildan boshlab ishlab chiqarilgan. Muhandislar bir yillik ishlab chiqarish davomida sportkarning 30 nusxasini yig‘gan bo‘lib, ular kuzovining rangi, sport “obvesi”, shuningdek, 17 dyuymli g‘ildirak diskalari va bortlaridagi “Nismo 270R” yozuvi bilan ajralib turgan. Bundan tashqari, zavoddagi tyuning vaqtida mashinaning “podveska”siga muqobil prujina va amortizatorlar, kuchaytirilgan mufta va kuzovga qo‘shimcha tirgaklar o‘rnatilgan.
Maxsus versiyaning interyeri original o‘rindiqlar qoplamasiga va uch kegayli sport rul chambaragiga ega bo‘lgan. Modeldagi asosiy o‘zgarish ikki litrli turbomotori bo‘lib, uning yordamida dvigatel 220 dan 270 gacha ot kuchini taqdim eta oladi. Agregat besh pog‘onali mexanik uzatmalar qutisi yordamida boshqariladi.
Sotuvga qo‘yilgan nusxa seriyadagi 29-avtomobil hisoblanadi. 27 yillik foydalanish davomida model 128 ming kilometr yo‘l bosgan. Bir necha yil avval Nissan Silvia’ning “podveska”si original ehtiyot qismlardan foydalangan holda ta’mirlangan, shuningdek, kuzovi bo‘yalgan.
Foydalanilganidan darak beruvchi ayrim jihatlari inobatga olinmasa, avtomobil ajoyib holatda saqlangan. Ayni vaqtda noyob Nissan Silvia S14 Nismo 270R uchun 42 250 dollar taklif etilmoqda.
Mavzuga doir: Foto: 900 ot kuchiga ega dvigatel o‘rnatilgan tillarang Nissan GT-R
