Moskvada o‘tgan sutkada 9056 kishida koronavirus aniqlandi, bu pandemiya boshidan buyon qayd etilgan mutlaq rekord, deb yozadi “RBK”.

So‘nggi marta Rossiya poytaxtida 2020-yil 24-dekabr kuni infeksiya yuqtirishning eng yuqori ko‘rsatkichi qayd etilgan bo‘lib, 8203 kishida COVID-19 aniqlangan edi.

Moskva meri Sergey Sobyanin 17-iyun kuni koronavirus bilan bog‘liq vaziyat tez yomonlashayotganini ma’lum qildi. Uning aniqlik kiritishicha, kasallanganlar soni 3 mingdan 7 minggacha o‘sgan.

18-iyun, juma kuni Sobyanin infeksiya tarqalishining oldini olishga qaratilgan yangi cheklovlar to‘g‘risidagi farmonni imzoladi. Xususan, Moskvada 1000 dan ortiq odam ishtirokidagi ommaviy ko‘ngilochar tadbirlar taqiqlandi, raqs maydonchalari va futbol muxlislari uchun muxlislik zonalari yopilmoqda.

Sergey Sobyaninning farmoni qo‘shimcha cheklov choralarini 29-iyunga qadar uzaytirdi. Shu vaqtga qadar umumiy ovqatlanish tashkilotlariga soat 23:00 dan 06:00 gacha ishlash taqiqlanadi. Bolalar o‘yingohlari, sport maydonchalari, fudkortlar va hayvonot bog‘lari yopiladi.

19-iyundan 29-iyungacha tajriba sifatida Moskvada 10—20 ta koronavirusdan xoli restoranlar ochiladi, ular tunda ishlashi mumkin bo‘ladi va u yerga odamlar QR-kod orqali kiritiladi.

Shu bilan birga Moskva meri o‘rinbosari Anastasiya Rakovaning ma’lum qilishicha, o‘tgan bir kecha-kunduzda, taxminan, 42 ming moskvalik koronavirusga qarshi emlansh uchun ro‘yxatdan o‘tdi. Bu bir hafta oldingi ko‘rsatkichga nisbatan to‘rt baravar ko‘p.

Moskvada COVID-19’ga chalinish holatlarining keskin o‘sishi ortidan Rossiyada kasallanganlarning umumiy ko‘rsatkichi fevral holatiga qaytdi. O‘tgan kun davomida respublikada COVID-19 bilan kasallangan 17 262 nafar yangi bemor aniqlandi, bu 1-fevraldan beri eng yuqori ko‘rsatkichdir.

Moskva bilan bir qatorda so‘nggi 24 soat ichida COVID-19 bo‘yicha yetakchilik qilgan hududlarga quyidagilar kiradi:

• Moskva viloyati — 1254;
• Sankt-Peterburg — 970;
• Buryatiya — 223;
• Nijegorod viloyati — 218.

Sankt-Peterburg davlat universiteti matematiklarining prognoziga ko‘ra, pandemiya yangi to‘lqinining eng yuqori nuqtasi iyun oyining oxirida bo‘ladi — kunlik kasallanish darajasi 25 ming kishiga yetishi mumkin. Yozning birinchi oyida faol bemorlar soni bo‘yicha ham rekord o‘rnatilishi, ularning soni 580 mingga yetishi mumkin (yanvar oyida 560 ming kishi bir vaqtning o‘zida kasallikni boshdan kechirgan). Iyul oyining o‘rtalariga kelib kasallanish kuniga 20 ming kishiga tushishi mumkin, shundan keyin u pasayishda davom etadi.

Umumiy hisobda, Rossiyada pandemiya boshlanganidan beri 5 million 281 mingdan ortiq kishida COVID-19 aniqlangan. Bemorlarning aksariyati sog‘ayib ketishga muvaffaq bo‘lgan, ammo 128 445 kishi kasallikdan vafot etgan. Tezkor shtab ma’lumotlariga ko‘ra, so‘nggi bir kun ichida 453 kishi COVID-19 qurboniga aylandi, ularning 78 nafari Moskvaga to‘g‘ri keladi.