Suvenirlar savdosi bilan shug‘ullanuvchi Prop Store kompaniyasi 29-iyun kuni Los-Anjelesda “sehrli” auksion o‘tkazadi. Kimoshdi savdolari 1-iyulga qadar davom etadi, deb xabar beradi Esquire.
Ta’kidlanishicha, suratga olish maydonchasida foydalanilgan 1200 dan ortiq buyum sotuvga qo‘yiladi. Masalan, “Garri Potter va o‘lim tuhfalari” filmining ikkita qismida suratga tushgan Deniel Redkliffning sehrli tayoqchasi va ko‘zoynagi sotiladi. Ushbu suvenirning boshlang‘ich narxi 30-50 ming dollarni tashkil etadi.
Indiana Jons haqidagi mashhur kinosaga muxlislari esa Xarrison Ford o‘lim ma’budasi Kaliga qarshi kurashgan qismidagi shlyapani qo‘lga kiritishi mumkin. “Yulduzlar jangi” ishqibozlari esa R2=SHP droid-astomexanikni uyiga olib ketish uchun “kurashadi”. Masofadan turib boshqariladigan robot narxi, taxminan, 120 ming dollarni tashkil etadi.
“Betmen” haqidagi filmlarni sevib tomosha qiluvchilar Maykl Kiton taqqan superqaramon kamarini 10 ming dollarga xarid qilish mumkin bo‘ladi.
Prop Store kompaniyasi asoschisi Stiven Leyn kinorekvizitlarni 1998-yildan boshlab kolleksiya qilishni boshlagan.
London va Los-Anjelesda joylashgan Prop Store omborlarida “Argo operatsiyasi” filmidagi Toni Mendesning beyji, Ridli Skottning “Gladiator” filmidagi ikkitalik ko‘prik, “Jeyms Bond: Halok bo‘l, faqat hozir emas” filmidagi Muz saroyidagi qo‘riqchining pulemyoti va boshqa ko‘plab buyumlar saqlanadi.
Izoh (0)