Yevropa Chempionlar Ligasining yarim final javob bahslari 4 va 5-may kunlari bo‘lib o‘tadi. UEFA mazkur o‘yinlarda faoliyat yuritadigan hakamlarni ma’lum qildi.
“Manchester Siti” va “PSJ” o‘rtasidagi uchrashuvni Byorn Kuypers boshchiligidagi niderlandiyalik hakamlar guruhi boshqarib boradi. VAR tizimida Pol van Bokel va Dennis Hagler ishlaydi. To‘rtinchi hakam — Tasos Sidirorulos (Gretsiya).
“Manchester Siti” — “PSJ” uchrashuvi Toshkent vaqti bilan 4-maydan 5-mayga o‘tar kechasi 00:00 da boshlanadi.
“Chelsi” — “Real” o‘yini esa italiyalik Daniele Orsatoga ishonib topshirilgan. Videotakrorlarga Massimiliano Irrati va Marko Guita javobgar bo‘ladi. To‘rtinchi hakam — Davide Massa.
Mazkur bahs 5-maydan 6-mayga o‘tar kechasi 00:00 dan start oladi.
Eslatib o‘tamiz, Orsato YChL 2019/20-yilgi mavsumida “Real”ning 1/8 final dastlabki bahsi doirasidagi “Manchester Siti”ga qarshi o‘yinida (1:2) ishlagan. Unda hakam madridliklar darvozasi tomon penalti belgilagan va Serxio Ramosga qizil kartochka ko‘rsatgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)