AQSh prezidenti Jozef Bayden ABC telekanaliga bergan intervyusida jurnalistning “Rossiya prezidenti Vladimir Putinni qotil deb hisoblaysizmi?” — degan savoliga tasdiq javobini berdi, deb yozadi Meduza. “Mmm, hmm, ha”, — deya javob qildi Bayden undan intervyu olayotgan Jorj Stefanopolusning savoliga.
https://twitter.com/BidenSquadron/status/1372151627403177984
Shuningdek, AQSh prezidenti Putin Amerikadagi saylovlarga aralashgani uchun “javob berishi”ga ishonch bildirdi.
Baydenning so‘zlariga ko‘ra, yanvar boshida u Putin bilan telefon orqali muloqot qilgan, shunda u Rossiya prezidentiga: “Men sizni bilaman, siz meni bilasiz. Agar shu narsa (Rossiya aralashuvi) rost bo‘lib chiqsa, unda (oqibatlarga) tayyor turing”, — degan.
Baydenning Putin haqidagi gaplaridan keyin Moskva birjasida Rossiya rublining kursi pasayib ketdi.
Rossiyaning AQShdagi elchisi Anatoliy Antonov maslahatlashuv uchun Moskvaga chaqirildi. U 20-mart kuni uchib kelishi kutilmoqda. Maslahatlashuvlar “AQSh bilan munosabatlar borasida qanday ish tutish va qaysi tomonga harakatlanish”ni tushunib olish maqsadida o‘tkaziladi, — deya TIVda ma’lum qilingan.
“Amerikaning yangi ma’muriyati hokimiyat tepasiga kelganiga qariyb bir oy bo‘ldi, yaqinda 100 kunlik marradan o‘tiladi, bu esa Jo Baydenning jamoasi nimani qoyillatib, nimani bajara olmayotganini baholashga urinib ko‘rish uchun yaxshi bahona. Biz uchun asosiysi — so‘nggi yillarda Vashington tomonidan boshi berk ko‘chaga kiritib qo‘yilgan va og‘ir ahvoldagi Rossiya—Amerika aloqalarini tuzatish yo‘llari qanday bo‘lishini aniqlab olish”, — deyiladi muassasa xabarida. TIV ikki tomonlama aloqalar “ortga qaytarib bo‘lmaydigan degradatsiya”ga yuz tutishiga yo‘l qo‘ymaslikdan manfaatdorligini qayd etdi.
AQSh esa Rossiya bilan munosabatlarda ochiqdan ochiq yo‘l tutib, Vashingtonni xavotirga solayotgan masalalarni dangal muhokama qilish niyatida ekanini Oq uy rasmiy vakili Jen Psaki ma’lum qildi. Uning ta’kidlashicha, Bayden ma’muriyatining Rossiya bilan munosabatlarga yondashuvi Donald Tramp jamoasidan farqli bo‘ladi. Bayden Rossiya vakillari bilan bevosita aloqalarda ham, jamoat oldidagi chiqishlarida ham keskin mavzularni chetlab o‘tmoqchi emas, dedi Psaki.
Shu bilan birga, Psakining aytishicha, manfaatlar mos tushadigan ba’zi masalalarda Vashington Moskva bilan hamkorlik qilishi mumkin. Misol sifatida u hujum qurol-yarog‘larini cheklash bo‘yicha kelishuvlarni keltirib o‘tdi.
AQSh Milliy razvedkasi 16-mart kuni hisobot e’lon qildi, unga ko‘ra, AQShda 2020-yilgi prezident saylovlari chog‘ida Rossiya hukumati Demokratik partiya nomzodi Jo Baydenni “badnom qilish” kampaniyasini uyushtirgan. Rossiya rahbariyati saylov jarayoniga jamoatchilik ishonchini pasaytirish, Donald Trampni qo‘llab-quvvatlash va Qo‘shma Shtatlardagi ijtimoiy-siyosiy kelishmovchiliklarni kuchaytirishga qaratilgan “ta’sir operatsiyalarini” o‘tkazgan. Hisobot mualliflarining fikriga ko‘ra, ushbu harakatlarga Rossiya prezidenti Vladimir Putin ruxsat bergan.
Rossiya Tashqi ishlar vazirligining rasmiy vakili Mariya Zaxarova va Rossiya prezidentining matbuot kotibi Dmitriy Peskov Rossiya hukumatining AQShdagi saylovlarga aralashuvi haqidagi ayblovlarni butunlay rad etdi. Peskovning fikricha, hisobotni e’lon qilish orqali Rossiyaga qarshi navbatdagi, yangi sanksiyalar masalasini kun tartibiga kiritish uchun bahonaga ega bo‘lmoqchi bo‘lishgan.
Izoh (0)