8-fevral kuni soat 06:50 da Toshkent shahrining Ko‘kcha Darvoza va To‘qimachi ko‘chalari kesishmasida ikkita yo‘lovchi avtobuslari YTH sodir etdi. Bu haqda “Toshshahartransxizmat” AJ matbuot xizmati xabar berdi.
Ma’lum qilinishicha, “18 Avtobus saroyi” MChJ tasarrufidagi, 46-sonli yo‘nalishda harakatlanuvchi MAN rusumli avtobus, 134-sonli yo‘nalishda harakatlanuvchi Isuzu rusumli avtobus bilan to‘qnashib ketgan.
YTH oqibatida bir nafar yo‘lovchi yengil tan jarohati olgan va shifoxonaga yetkazilgan. Hozirda unga tez tibbiy yordam ko‘rsatilmoqda.
“Mazkur holat yuzasidan ‘Toshshahartransxizmat’ aksiyadorlik jamiyatining Yo‘lovchi transportida harakat xavfsizligini nazorat etish boshqarmasi tomonidan xizmat surishtiruv ishlari o‘tkazilmoqda”, — deyiladi xabarda.
Eslatib o‘tamiz, dekabr oyi boshida Toshkentda 72 va 148-avtobuslari poyga uyushtirganligi sababli to‘qnashgani haqida xabar berilgandi. Keyinroq haydovchilarning ikkalasi ham ishdan bo‘shatilgani ma’lum qilingan edi.Mavzuga doir: Toshkentda avtobuslar yana poyga uyushtirdi. Haydovchilar jarimaga tortilgan
